Klei kƀĭn trông bi klă knhuang đĭ kyar mrâo mơ̆ng čar Dak Lak leh bi mŭt mbĭt, mbĭt anăn pŏk wăl anôk đĭ kyar hŏng hdră tă sui, mkŏ mjing tur knơ̆ng iêo jak phung duh bi liê. Hlăm klei čuăl mkă mrâo, Dak Lak mdưm mta kñăm jing anôk đĭ kyar mơ̆ng krĭng Dhŭng kwar krah leh anăn Lăn Dap Kngư, đĭ kyar hŏng êlan mtah, mrâo mrang leh anăn hơĭt kjăp.

Klei kreh knhâo mrâo mrang, mlih mrâo mbruă, bi mlih mrô leh anăn bruă duh mkra êa ksĭ mâo čar Dak Lak bi klă jing dŭm boh kdrŭt đĭ kyar mrâo. Hlăm wăl anôk đĭ kyar mrâo dưi mkŏ mjing hluê gru hmô 3 krĭng đĭ kyar, 3 êlan knhal bruă duh mkra leh anăn 2 anôk bruă boh kdrŭt. Hlăm anăn, alŭ wăl Ƀuôn Ama Thuô̆t lŏ dơ̆ng ngă bruă klam jing mta phŭn đĭ kyar ti Lăn Dap Kngư, bi nah ngŏ dôk dưi tă hdră jing anôk đĭ kyar mrâo kơ bruă tuh tia, logistic, kdrŭn ksĭ leh anăn bruă duh mkra êa ksĭ, đĭ kyar hluê si bruă duh mkra mtah, bruă duh mkra dar, mlih mrâo mbruă leh anăn bi mlih mrô. Gĭr mâo klei đĭ kyar GRDP knar knar wưng thŭn 2026 - 2030 mâo mơ̆ng 11% hlăm sa thŭn, truh thŭn 2030 hnư hrui wĭt kah knar grăp čô mâo êbeh 153 êklăk prăk.

Hlăm klei kƀĭn trông, khua Bruă sang čư̆ êa čar Dak Lak mñă klă:

 “Mta kñăm đĭ kyar pral, hơĭt kjăp knŏng dưi mâo tơdah bruă kđi čar hrăm mbĭt hŏng knơ̆ng bruă, phung duh bi liê. Klei mâo phung duh bi liê hmăng hmưi amâo djŏ knŏng hdră tă ƀiădah lŏ mâo sa bruă Knŭk kna ngă bruă klă mngač, ktang phĭt leh anăn hrăm mbĭt. Kyuanăn, mbĭt hŏng bruă bi kluôm klei čuăl mkă, duh bi liê bruă mkŏ mkra leh anăn mprăp kơ keh lăn, Dak Lak bi klă bi mlih klei ngă hră mơar Knŭk kna, bi hơĭt wăl anôk duh bi liê mnia mblei jing bruă klam phŭn, mâo knhuah kdlưn hĭn, mă mnuih ƀuôn sang leh anăn knơ̆ng bruă jing mta phŭn đru bruă.

Ti anôk bi kƀĭn, čar Dak Lak ăt hưn mdah anăn dŭm bruă mđing iêô jak bi liê, kƀĭn hlăm bruă lŏ hma yua kdrăp mrâo leh anăn mkra mjing êlam, bruă tuh tia mkra mjing, êa pui êwa čuh,  logistics leh anăn anôk bruă nah gŭ. Knơ̆ng bruă sang čư̆ êa čar Dak Lak mđup brei  hră mtrŭn tŭ ư hdră êlan bi liê kơ 25 hdră bruă, hŏng ênoh bi liê êbeh 40.290 êklai prăk. Čar ăt siñê hră bi hdơr bi hgŭm hŏng 78 pô duh bi liê, mâo ênoh prăk bi liê čih tal êlâo êbeh 1 êklăk êklai prăk./.