Mơ̆ng akŏ thŭn truh ară anei, wăl duh mkra leh anăn dŭm wăl tuh tia mkra mjing ti alŭ wăl iêô jak thiăm lu hdră bruă mrâo hlăm bruă tuh tia mkra mjing leh anăn êa pui êwa čuh. Hnơ̆ng bi leh ti dŭm wăl tuh tia mkra mjing dôk ngă bruă mâo hlăm brô 92%. Wăl duh mkra Nam Phú Yên leh anăn dŭm wăl tuh tia mkra mjing iêô jak mâo 133 hdră bruă hŏng ênoh bi liê mâo giăm 35.000 êklai prăk. Hlăm klei bi trông, lu klei gun kpăk djŏ tuôm kơ anôk bruă nah gŭ wăl tuh tia mkra mjing, mưn lăn leh anăn hră mơar bi liê mâo anôk bruă duh mkra lač, akâo ruh mgaih čiăng găl ênưih mkra mjing mnia blei.

Khua gĭt gai Anôk bruă kriê dlăng wăl Duh mkra Nam Phú Yên  brei thâo, anôk bruă dôk mđĭ mkra mlih hră mơar, mđĭ ktrâo lač kơ anôk bruă duh mkra ngă hră mơar găl ênưih hĭn. Hŏng klei akâo pŏk êlan mkŏ Wăl duh mkra An Phú kơ êlan mrô 14, mĭn tĭng hdră bruă srăng bi leh êlâo kơ hruê 15/7.  Kơ klei kčĕ prăk mưn lăn sa blư̆, Anôk bruă kriê dlăng srăng bi hgŭm ktrâo lač anôk bruă duh mkra ngă hră mơar mkra mlih hlue si hdră kčah. Gưl anei, Anôk bruă kriê dlăng Wăl duh mkra Nam Phú Yên ăt mđup brei hdră mtrŭn bi liê leh anăn hră bi mklă bi liê kơ 5 hdră bruă mrâo hŏng ênoh bi liê giăm 1.200 êklai prăk./.