Hluê si klei hưn mdah, klei đĭ kyar bruă duh mkra hlăm 6 mlan akŏ thŭn mơ̆ng čar Dak Lak đăo tĭng 7,8%, ƀiă hĭn mkă hŏng hdră kčah mơ̆ng 9% kơ dlông. Hlăm 12 ênoh čuăn phŭn, mâo 5 ênoh čuăn mâo leh anăn êgao hdră kčah, 1 ênoh čuăn dưi djăp ênŭm.

Bruă iêo jak ai dưi, brei čan duh bi liê bruă Knŭk kna, ruh mgaih anôk ala leh anăn bruă mkra mjing, mnia mblei mơ̆ng knơ̆ng bruă ti Dak Lak dôk tuôm hŏng lu klei dleh dlan. Hlăm klei kƀĭn, Êpul gơ̆ng bruă ƀuôn sang čar Dak Lak srăng ksiêm dlăng 30 klei hưn mdah, 20 hră hưn mdah djŏ tuôm hŏng bruă ngăn prăk, duh bi liê bruă Knŭk kna, bi mlih mrô, sang hră mơar, mdrao mgŭn, bruă lĭng kahan, gang mkhư̆ klei truh yan adiê leh anăn  ngă bruă Knŭk kna dua gưl. Mta phŭn klei êmuh leh anăn wĭt lač klei êmuh ăt kñăm kơ dŭm hdră ngă bruă, brei čan duh bi liê bruă Knŭk kna, msir klei akâo mơ̆ng mnuih ƀuôn sang leh anăn ruh mgaih klei dleh dlan hlăm klei kiă kriê, gĭt gai.