Gŏ sang amai H’Unh Hmok ti ƀuôn Tul A, să Ea Wer, čar Dak Lak dôk hlăm ênoh gŏ sang ƀun. Klei hdĭp dleh dlan ngă kơ bruă mđing kơ anak nao sang hră grăp thŭn hriăm mrâo jing bruă amâo ênưih ôh. Lu thŭn êgao, nai mtô Sang hră gưl sa Nguyễn Du uêñ mĭn, mđĭ ai leh anăn đru kơ gŏ sang dŭm mta mnơ̆ng yua čiăng kơ anak amai H’Unh lŏ dơ̆ng hriăm hră.

"Mâo nai ăt mđing dlăng đru, mđĭ ai wăt tơdah klei hdĭp dleh dlan ăt mđing kơ anak pô nao sang hră. Kâo amâo mâo giê čih, amâo mâo hdruôm hră amâo dah amâo mâo hră hriăm ôh snăn kâo lač hŏng nai. Mâo klei găl sơnăn nai đru kâo klei anăn."

Sang hră gưl sa Nguyễn Du, să Ea Wer, čar Dak Lak mâo êbeh 85% phung hđeh jing mnuih djuê ƀiă, hlăm anăn lu phung hđeh mâo klei hdĭp dleh dlan. Čiăng krơ̆ng kjăp ênoh hđeh hriăm hră, sang hră bi mklă brei thâo klă klei hdĭp grăp gŏ sang leh anăn čŏng pô mtrŭt mjhar phung hđeh nao sang hră. Nai mtô H'Thong Thíp brei thâo, mơ̆ng akŏ mlan 8, mbĭt hŏng klei hâo hưn hlăm hla pŏk yang ƀuôn Zalo, Facebook, nai mtô lŏ nao truh kơ grăp gŏ sang, boh nik dŭm gŏ sang dleh dưi thâo săng klei hâo hưn, čiăng mtrŭt mjhar phung amĭ ama ba anak nao sang hră.

Khă gơ̆ hưn mthâo leh hlăm dŭm anôk hâo hưn msĕ si Zalo, Facebook, ƀiădah lu jing mnuih djuê ƀiă snăn phung amĭ ama ƀiă mâo klei mđing. Dŭm gŏ sang amâo dưi truh hŏng klei hâo hưn hlăm internet, nai mtô mnuih djuê ƀiă ti anôk dôk srăng nao truh ti sang mđĭ ai phung amĭ ama ba hră mơar, mbĭt anăn hưn mthâo wưng, anôk čiăng kơ phung hđeh nao sang hră."

Ba phung hđeh nao sang hră dleh leh, čiăng kơ diñu hơĭt ai tiê hriăm hră lŏ čiăng mâo klei đru kơ hdruôm hră, čhum ao leh anăn mnơ̆ng yua hriăm hră. Kyua anăn, phung nai ti Dak Lak kreh mtrŭt mjhar dŭm êpul êya, grăp čô hgŭm đru kơ phung hđeh mâo klei hdĭp dleh dlan. Kyua anăn, lu sang hră ti krĭng taih kbưi, krĭng dleh dlan ăt krơ̆ng kjăp 100% phung hđeh nao sang hră hluê si hdră kčah leh anăn amâo mâo phung hđeh lui sang hră.

Nai Đỗ Thị Xuân, Khua sang hră gưl sa Nguyễn Du (să Êa Wer), lač, êlâo kơ thŭn hriăm mrâo, lu hnư mnơ̆ng lŏ dơ̆ng mđup brei kơ phung hđeh mâo klei hdĭp dleh dlan, lŏ mđĭ ai phung hđeh nao sang hră.

“Mâo leh dua êpul êya, mnuih hriê đru kơ sang hră. Tal êlâo jing iêo mkrum hdruôm hră, mnơ̆ng yua hriăm hră kơ phung hđeh mâo gŏ sang ƀun leh anăn phung hđeh mâo klei hdĭp dleh dlan. Leh anăn mphŭn mŭt hlăm thŭn hriăm mrâo sơnăn sang hră ăt iêo mkrum leh mơh êpul bruă đru ba jing đru kơ sang hră jing 170 blah čhum ao, hdruôm hră kơ phung hđeh sang hră mâo gŏ sang ƀun amâodah dleh dlan.”

Thŭn hriăm 2026-2027, Sang hră Knŭk kna rông ba mlir gưl hriăm gưl sa-gưl dua Ƀuôn Đon, čar Dak Lak mŭt hlăm thŭn hriăm tal êlâo hluê gru hmô sang hră knŭk kna rông ba mlir gưl hriăm, hŏng êbeh 40 adŭ leh anăn êbeh 1.100 čô hđeh sang hră. Wăt tơdah anôk bruă nah gŭ dưi duh bi liê kjăp, dŭm čô hđeh sang hră gưl 1 truh kơ gưl 3 ti ƀuôn Drang Phôk ăt tuôm hŏng klei dleh dlan tơdah nao sang hră mrâo, kyua boh kbưi mơ̆ng sang truh kơ sang hră mơ̆ng 15 truh êbeh 20 km. Thái Văn Lộc, Khua sang hră, lač boh sĭt, mơ̆ng klei akâo mơ̆ng phung amĭ ama, sang hră dôk kčĕ hdră đru kơ êdeh mdiăng hđeh sang hră.

Sang hră ăt kčĕ leh hŏng bruă sang čư̆ êa să kčĕ hŏng čar akâo klei đru prăk kăk čiăng mâo êdeh mdiăng phung anak: aguah nao mơ̆ng ƀuôn Drang Phôk leh anăn tlam drông wĭt mơ̆ng sang hră knŭk kna čiêm rông, čiăng kơ phung anak dưi hriăm hră, mjuăt bi hriăm hlăm wăl anôk êđăp ênang, prŏng siam, djăp ênŭm leh anăn mâo djăp anôk bruă čiăng kriê dlăng kơ phung anak dưi jăk hĭn."

Dŭm klei yăl dliê ti dŭm sang hră krĭng dleh dlan brei ƀuh, klei gun kpăk nao sang hră amâo djŏ knŏng dôk ti klei găl bruă duh mkra ƀiădah lŏ dôk ti hnơ̆ng kbưi hŏng lăn hang, klei dưi dưn yua klei hâo hưn leh anăn klei găl hdĭp mda mơ̆ng grăp gŏ sang. Kyua anăn, mprăp kơ thŭn hriăm mrâo brei mphŭn mơ̆ng bruă thâo klă grăp klei dleh dlan čiăng mâo hdră msir djŏ guôp.

Lương Nguyễn Minh Triết, Khua hlăm bruă Đảng gưl dlông, Khua bruă Đảng čar Dak Lak mtă kơ dŭm alŭ wăl rơ̆ng kơ sang hră, nai mtô, hdruôm hră leh anăn dŭm klei găl hriăm hră, boh nik ti krĭng taih kbưi, krĭng mnuih djuê ƀiă, knông lăn.

“Rơ̆ng djăp ênŭm anôk bruă nah gŭ, adŭ hriăm, hdruôm hră mtô bi hriăm, kdrăp mnơ̆ng mtô bi hriăm leh anăn dŭm klei găl čiăng mkăp kơ thŭn hriăm mrâo. Lŏ dơ̆ng ksiêm dlăng, tĭng dlăng klă sĭt hnơ̆ng mtô leh anăn hriăm; mâo hdră msir klă klơ̆ng mđĭ hnơ̆ng jăk bruă mtô bi hriăm krĭng mnuih djuê ƀiă, krĭng taih kbưi, krĭng knông lăn; bi hrŏ klei bi kpleh plah wah dŭm krĭng; bi hrŏ ênoh hđeh sang hră lui hriăm, mđing truh amâo mâo ôh hđeh sang hră lui hriăm kyua klei dleh dlan".

Mơ̆ng sa pŏk hdruôm hră, kdrăp čŭt hơô truh kơ êdeh mdiăng, dŭm klei đru klă sĭt hlăk đru kơ phung hđeh krĭng dleh dlan Dak Lak lŏ mâo klei găl nao sang hră. Ti tluôn klei mprăp kơ sa thŭn hriăm mrâo amâo djŏ knŏng dŭm boh sang hră dưi mkra mđĭ, ƀiădah lŏ jing klei gĭr čiăng amâo mâo hđeh hriăm hră lui klei hriăm kyua klei hdĭp amâo dah kbưi hŏng anôk.