6 mlan akŏ thŭn, ênoh mnơ̆ng dhơ̆ng bruă duh mkra Dak Lak đăo tĭng đĭ 8%; prăk hrui wĭt hiu čhưn ênguê đĭ êbeh 37%; mâo êbeh 1.990 anôk bruă duh mkra mkŏ mjing mrâo. Klei bi kƀĭn hưn mdah Hdră čuăl mkă leh anăn mđĭ kyar bi liê čar Dak Lak iêô jak 103 pô bi liê čih anăn pŏk ngă 147 hdră bruă hŏng ênoh bi liê mĭn tĭng êbeh 1 êklăk êklai prăk; 25 hdră bruă, ênoh prăk bi liê 40.290 êklai prăk dưi mkăp hdră mtrŭn bi liê.

Gĭt gai klei bi kƀĭn, Lương Nguyễn Minh Triết, Khua dlăng bruă Đảng čar Dak Lak mtă kơ dŭm gưl, dhar bruă kƀĭn djăp klei găl ngă klei kñăm đĭ kyar mơ̆ng 10% kơ dlông hlăm thŭn 2026; mđĭ boh tŭ dưn ngă bruă mơ̆ng bruă sang čư̆ êa alŭ wăl dua gưl; mđĭ mkra mlih hră mơar knŭk kna, mlih mrô, ruh mgaih klei dleh dlan kơ anôk bruă duh mkra, mđĭ pral dŭm hdră bruă phŭn leh anăn hyuă kjăp klei ngă bruă hră mơar, mguôp bruă klam pô gĭt gai hŏng boh tŭ hlue ngă bruă klam.