Klei bi kƀĭn mă leh 101 klei akâo mơ̆ng Anôk bruă duh mkra, êpul hgŭm bruă leh anăn gŏ êsei mnia blei, kƀĭn hlăm dŭm hdră msir mkra mlih wăl bi liê, ruh mgaih klei dleh dlan kơ bruă mkra mjing mnia blei leh anăn mđĭ kyar bruă duh mkra êngao knŭk kna. Dŭm klei blŭ akâo brei lŏ dơ̆ng bi leh klei bhiăn, bi hrŏ hră mơar knŭk kna, ruh mgaih klei gun kpăk kơ lăn ala, čuăl mkă, bi liê, rŭ mdơ̆ng leh anăn bi liê; mbĭt anăn mđĭ klei dưi čan prăk, hdră êlan jia leh anăn klei găl mđĭ kyar. Võ Thị Hà Giang, bi ala kơ Êpul gủp kphê Trung Nguyên, mâo klei akâo:

“Hmei kâo kơ Gưl dlông leh anăn čar lŏ dơ̆ng ksiêm hriăm kơ klei bhiăn mdê hjăn kơ čar Dak Lak mơ̆ng 5 klei phŭn: kơ hdră êlan knŭk kna, kơ anôk bruă nah gŭ, kơ mnuih mă bruă, kơ ngăn prăk leh anăn klei knhâo kdrăp mrâo.”

Êpul êya anôk bruă duh mkra ăt akâo mđĭ bi liê anôk bruă êlan klông nah gŭ, logistics, duh mkra mrô; đru mđĭ bruă mnia blei, mđĭ kyar mnia blei điện tử, hiu čhưn ênguê leh anăn iêô jak duh bi liê. Lu klei blŭ kčĕ mđĭ ba yua kdrăp mrâo  rmang, mlih mrô, kah mbha ênoh mrô duh kơ bruă mkra mjing mnia blei; hmao msir mgaih klei dleh dlan, gun kpăk mâo hlăm hdră ngă bruă. Trần Khánh Minh, bi ala kơ Êpul hgŭm hiu čhưn ênguê čar Dak Lak mâo klei blŭ:

“Klei dleh dlan hĭn anôk bruă duh mkra ară anei, hmei čiăng ngă hiu čhưn ênguê mtah, ngă klă klơ̆ng ƀiădah amâo thâo ôh si ngă jing hnơ̆ng čuăn. Kyua kƀah sa hnơ̆ng mkă hdră bhiăn klă mngač, dŭm anô bruă kriê dlăng ti alŭ wăl ăt mtŭl mtŭl hlăm klei mkăp bruă kriê dlăng lăn ala amâodah rŭ mdơ̆ng hdră bruă ti lăn lŏ hma dliê kmrơ̆ng bi mguôp ngă bruă hiu čhưn ênguê. Anôk bruă duh mkra ngă sĭt, jih ai tiê snăn huĭ kơ ngă soh. Akâo kơ bi pral mâo hră mơar leh anăn ba yua hnơ̆ng čuăn kơ klei hiu čhưn ênguê mtah.”

 Wĭt lač klei blŭ, klei akâo mơ̆ng êpul êya anôk bruă duh mkra, Đỗ Hữu Huy,  Khua mkăp hlăm bruă Đảng gưl dlông, Khua Knơ̆ng bruă sang čư̆ êa čar Dak Lak brei thâo, alŭ wăl ngă leh leh anăn dôk kƀĭn gĭt gai jih ai tiê dŭm hdră msir đĭ kyar; mkŏ mjing Anôk bruă gĭt gai dua ênoh mrô leh anăn dŭm êpul mă bruă thơ̆ng kñăm hrăm mbĭt, ruh mgaih klei dleh dlan kơ anôk bruă duh mkra, phung bi liê. Hlue si Đỗ Hữu Huy, alŭ wăl mđing kơ klei mkra mđĭ wăl bi liê mnia blei, mđĭ mkra mlih hră mơar hlue si hdră mă êpul êya anôk bruă duh mkra jing phŭn kơ klei ngă bruă.

“Knơ̆ng bruă sang čư̆ êa čar Dak Lak bi mklă hrăm mbĭt, mđing hmư̆ leh anăn đru kơ anôk bruă duh mkra, êpul hgŭm bruă, gŏ êsei mnia blei jing bruă klam nanao. Amâo djŏ knŏng jing ngă hlăm klei bi kƀĭn ôh, ai tiê kluôm mơ̆ng Knơ̆ng bruă sang čư̆ êa čar jing bi mlih mơ̆ng klei mĭn ngă hră mơar jing klei mĭn mă bruă leh anăn hrăm mbĭt hŏng êpul êya bruă duh mkra.”

Klah čŭn klei bi kƀĭn bi tuôm phung bi ala hŏng êpul êya anôk bruă duh mkra, êpul hgŭm bruă leh anăn gŏ êsei mnia blei, Lương Nguyễn Minh Triết, Khua hlăm bruă Đảng gưl dlông, Khua dlăng bruă Đảng čar, Khua êpul bi ala bruă kƀĭn ala čar Dak Lak bi mklă klei gĭr kđi čar yuôm bhăn hĭn mơ̆ng čar hlăm bruă ruh mgaih klei dleh dlan, gun kpăk hlăm bruă mkra mjing, mnia blei hŏng klei klă sĭt.

Khua dlăng bruă Đảng čar jao bruă klam kơ Knơ̆ng bruă sang čư̆ êa čar mđĭ mlih mrâo hdră bi blŭ hrăm, mđing hmư̆, mă klei blŭ mguôp, klei akâo mơ̆ng dŭm anôk bruă duh mkra. Mbha klă bruă klam mơ̆ng grăp čô mnuih, anôk bruă hlăm klei msir mgaih jih hnơ̆ng, pral klei akâo mơ̆t leh. Êpul bi ala bruă kƀĭn ala, Êpul gơ̆ng bruă ƀuôn sang čar Dak Lak ăt srăng ngă klei ksiêm dlăng klei ƀuăn rơ̆ng mơ̆ng Knơ̆ng bruă sang čư̆ êa čar ăt msĕ mơh dŭm knơ̆ng, dhar bruă, alŭ wăl hŏng êpul êya anôk bruă duh mkra.

“Čar Dak Lak bi mklă sa blư̆ dơ̆ng, jih ai tiê dlăng myuôm bruă klam mơ̆ng krĭng wăl bruă duh mkra, hlăm anăn mâo bruă duh mkra êngao knŭk kna. Anei jing boh kdrŭt yuôm bhăn snăk čiăng kơ čar mâo klei kñăm đĭ kyar dua ênoh mrô hlăm wưng kơ anăp. Hmei čang hmăng êpul êya anôk bruă duh mkra lŏ dơ̆ng ksiêm hriăm, hlue ngă kjăp hdră čah hdră bhiăn, mlih mrâo klei mĭn mnia blei, ba yua dŭm hdră êlan mđing tal êlâo, hdră êlan lač leh hlăm Hdră mtrŭn mrô 68 mơ̆ng Phŭn bruă kđi čar kơ klei mđĭ kyar bruă duh mkra êngao knŭk kna čiăng mđĭ kyar bruă duh mkra.”

Mơ̆ng dŭm klei ƀuăn rơ̆ng hlăm klei bi kƀĭn, Dak Lak dôk ba klei hâo hưn ktang kơ sa knŭk kna mlih mrâo, mă anôk bruă duh mkra jing phŭn kơ klei ngă bruă. Bruă mlih mrâo hdră bi blŭ hrăm, mbha klă bruă klam leh anăn ksiêm dlăng kjăp boh tŭ hlue ngă amâo djŏ knŏng đru ruh mgaih klei gun kpăk tal êlâo ôh ƀiădah lŏ mjing klei đăo knang kơ êpul êya duh mkra.  Anei jing knhuang nao klă klơ̆ng čiăng ba ai tiê Hdră mtrŭn 68 mơ̆ng Phŭn bruă kđi čar hlăm boh sĭt, mjing klei mđing hmư̆ jing bruă ngă, mjing klei ƀuăn rơ̆ng jing boh tŭ đĭ kyar klă klơ̆ng./.