Bruă duh mkra mrô mơ̆ng Dak Lak dưi tă hdră êlan mđĭ kyar hlăm dua hdră: mkŏ mjing dŭm bruă kdrăp hâo hưn, mtô mblang leh anăn bruă duh mkra mrô; mbĭt anăn ba kdrăp mrô lar bra hlăm dŭm bruă duh mkra phŭn msĕ si bruă lŏ hma, mkra mjing, mnia blei, hiu čhưn ênguê leh anăn logistics. Mta kñăm truh thŭn 2030, bruă duh mkra mrô đru mguôp mơ̆ng 30% GRDP kơ dlông; 100% klei čih pioh yua mbĭt leh anăn dhar bruă dưi bi mlih mrô, mkŏ, kah mbha.

Čiăng dưi mâo mta kñăm anei, Dak Lak srăng mđing bi leh klei bhiăn, hdră êlan; mđĭ kyar anôk bruă nah gŭ leh anăn mrô; mtrŭt mđĭ anôk bruă duh mkra mrô, mnuih mă bruă mrô; mbĭt anăn mđĭ ba yua kdrăp mrâo hlăm dŭm bruă duh mkra leh anăn rơ̆ng klei êđăp ênang, klei êđăp ênang êlan mạng. Ti anôk bi kƀĭn kơ bruă duh mkra mrô mơ̆ng knơ̆ng bruă sang čư̆ êa čar Dak Lak, lu klei blŭ lač boh phŭn amâo djŏ knŏng duh bi liê thiăm anôk bruă nah gŭ amâodah mkŏ mjing dŭm tur knơ̆ng, ƀiădah brei mlih hdră êlan mđĭ kyar mơ̆ng knang kơ hnơ̆ng mnơ̆ng dhơ̆ng jing knang lu hĭn kơ klei čih pioh leh anăn kdrăp mrâo mrang, mơ̆ng anăn mjing boh tŭ yuôm bruă duh mkra klă sĭt. Kdrăp ksiêm dlăng mrô ăt dưi ba mdah čiăng ktuê dlăng, ksiêm dlăng leh anăn gĭt gai dŭm hnơ̆ng kčah mđĭ kyar bruă duh mkra mrô.

Khua knơ̆ng bruă sang čư̆ êa čar Dak Lak Đỗ Hữu Huy mtă brei mkŏ mjing hdră kčah kơ bruă duh mkra mrô hluê si ai tiê "6 klă". Grăp bruă klam brei bi mklă sa anôk bruă gĭt gai leh anăn mâo mta phŭn klă klơ̆ng.

Băng: "Jao klă kơ grăp knơ̆ng bruă, grăp bruă sa leh anăn mnơ̆ng dhơ̆ng mơ̆ng knơ̆ng bruă mlan anei si ngă, mlan êdei si ngă. Mtă jing grăp mlan brei mâo 1 mta mnơ̆ng dhơ̆ng čiăng kơ klă, klă mnuih, klă bruă. Hlăm hdră pŏk ngă mơ̆ng čar mtă leh kơ grăp sa să ƀuôn hgŭm mâo sa KOL (mnuih kdlưn hĭn) čiăng hưn mdah dŭm tur knơ̆ng bruă hiu čhưn ênguê leh anăn mnơ̆ng dhơ̆ng, mnơ̆ng dhơ̆ng OCOP mơ̆ng alŭ wăl hlăm hla pŏk yang ƀuôn. Kâo mtă brei nao hlăm mnơ̆ng dhơ̆ng dưi mkă tĭng klă klơ̆ng."