Hlăm ênoh phung hđeh hriăm hră gưl tal êlâo mơ̆ng Sang hră Dhar kreh kahan ksiêm yang ƀuôn II mâo adei Y Gió Mlô, hđeh hriăm hră adŭ 10, djuê ana M'Nông, ti ƀuôn Drang Pôk, să Ƀuôn Đon, čar Dak Lak. Ama leh anăn amĭ djiê kyua ruă duam, 5 čô ayŏng amai adei bi đru hdơ̆ng găp hlăm klei hdĭp adôk lu klei kƀah. Amai khua Nguyễn Thị Ngân Mlô mdei hriăm hră hnưm čiăng ngă anôk jưh knang kơ phung adei. Kyua anăn, hruê Y Gió tŭ yap djŏ ruah mŭt hriăm Sang hră Dhar kreh kahan ksiêm yang ƀuôn II ăt jing hruê gŏ sang mâo thiăm klei čang hmăng. Amai Nguyễn Thị Ngân Mlô brei thâo:

“Grăp thŭn hriăm jing hdruôm hră, čhum ao, wăl anôk hriăm. Kyua sang hră tinei kbưi dŭm pluh km, anăn yơh jing klei dleh dlan hĭn mơ̆ng gŏ sang. Pô knŏng hriăm truh adŭ 9 leh anăn mdei mơh klei čang hmăng nao sang hră pô. Leh mâo mă hră bi mklă adei pô dưi mŭt sang hră Công an snăn anăn amâo djŏ knŏng jing klei čang hmăng mơ̆ng adei, ƀiădah lŏ jing klei čang hmăng mơ̆ng pô, jing klei čang hmăng mơ̆ng gŏ sang”.

Hŏng Y-Gió, dŭm hruê tal êlâo ti sang hră jing sa knhuang bi mlih prŏng. Kbưi hŏng gŏ sang, mjĕ hŏng nai mtô, ƀĭng găp leh anăn wăl anôk dôk, ñu ƀuh klă hĭn bruă klam pô hŏng phung găp dôk ti sang.

"Kâo khăp kơ ayŏng, khăp kơ amai, khăp kơ adei. Kâo srăng gĭr hriăm hră mơar čiăng jing anôk jưh knang kơ gŏ sang".

Ăt mphŭn pŏk thŭn hriăm mrâo ti Sang hră dhar kreh kahan ksiêm yang ƀuôn II, adei Hoàng Ngọc Hoa, hđeh hriăm hră adŭ 10, ti să Êa Wer, čar Dak Lak, djă ba klei hdĭp lu klei kƀah. Awa ñu tuôm nao hlăm klei bi blah, djŏ êa drao ruă diosin. Ama ñu amâo mâo jăk asei mlei, amĭ djiê ưm kyua klei truh. Mơ̆ng điêt, Hoa hriăm mbĭt anăn kriê dlăng ama leh anăn adei điêt. Hŏng gŏ sang Hoa, klei adei dưi mŭt hriăm ti sang hră mrâo jing klei găl čiăng kơ adei mâo klei găl hriăm hră, mjuăt ktang asei mlei jăk hĭn. Amâo djŏ knŏng mâo thiăm klei găl hriăm hră, wăl anôk mrâo lŏ thiăm klei mđĭ ai čiăng kơ Hoa tui tiŏ klei hmăng hmưi mâo mĭn mơ̆ng điêt. Mơ̆ng klei čiăng jing lĭng kahan Kahan ksiêm, ñu lŏ mâo klei gĭr hĭn êjai dưi hriăm hlăm sang hră mdê hjăn anei:

"Mơ̆ng điêt kâo mâo klei čang hmăng ngă kahan ksiêm, amâo thâo ôh kâo dưi ngă mơ̆, ƀiădah ară anei kâo dưi mŭt hlăm Sang hră kahan ksiêm leh, kâo ƀuh klei čang hmăng kâo giăm truh leh, čiăng ngă anôk jưh knang kơ ama kâo leh anăn kyua kâo čiăng kơ ƀuôn sang pô mâo klei êđăp ênang nanao".

Mbĭt hŏng Y-Gió leh anăn Ngọc Hoa, phung hđeh hriăm hră mâo klei hdĭp dleh dlan mkăn ăt dôk jing phung hđeh hriăm hră tal êlâo mơ̆ng Sang hră Dhar kreh kahan ksiêm yang ƀuôn II. Thŭn hriăm 2026-2027, sang hră hrŏng ruah ti Dak Lak, Gia Lai, Lâm Đồng leh anăn Quảng Ngãi, hŏng hnơ̆ng 34 adŭ, êbeh 1.000 čô hđeh hriăm hră. Anei jing gru hmô sang hră truăn kơ bruă mơ̆ng gưl hđeh điêt truh kơ gưl tlâo, pioh kơ dŭm êpul hđeh hriăm hră mâo klei hdĭp dleh dlan, hlăm anăn mâo anak kahan êka êkeh, djiê êngiă; anak gŏ sang knŭk kna dlăng ba mâo klei hdĭp dleh dlan; anak čô mnuih djuê ƀiă hlăm gŏ sang ƀun, giăm ƀun leh anăn phung hđeh dôk hlăm hdră đru yang ƀuôn.

Mta kñăm mơ̆ng sang hră amâo djŏ knŏng ba hđeh nao sang hră ƀiădah lŏ kriê dlăng, mtô bi hriăm leh anăn mjuăt bi hriăm kluôm ênŭm. Wăl anôk dôk đru kơ phung hđeh dưi hdĭp mbĭt, jĕ giăm hŏng nai mtô, dưi mâo klei uêñ mĭn, thâo ƀuh klei mĭn leh anăn klei hdĭp čiăng mâo hdră mtô bi hriăm djŏ guôp. Dŭm hdră bruă lông ngă, nao čuă dlăng, mjuăt bi hriăm klei thâo leh anăn bruă ngă hlăm êpul ăt srăng dưi mkŏ mjing, đru kơ phung hđeh ƀrư̆ ƀrư̆ đĭ hriê kơ prŏng, jhŏng hĭn. Đại tá Mai Hữu Vạn, Khua Sang hră Dhar kreh kahan ksiêm yang ƀuôn II brei thâo, sang hră bi mklă mkŏ mjing wăl anôk mtô bi hriăm jăk siam, êđăp ênang, kjăp jing bruă klam yuôm bhăn.

“Sang hră Dhar kreh kahan ksiêm yang ƀuôn II gĭr ktưn jing anôk jăk siam - anôk phung hđeh dưi kriê dlăng, dưi mtô mjuăt, dưi mjuăt bi hriăm leh anăn mâo thiăm klei đăo knang čiăng găn klei dleh dlan".

Dŭm hruê tal êlâo mŭt hriăm, phung hđeh ăt dôk mâo lu klei mđing uêñ. Ƀiădah ti tluôn grăp čô hđeh hriăm hră jing sa klei hdĭp, sa klei yăl dliê leh anăn sa klei čang hmăng mdê mdê. Hŏng phung hđeh tuôm dôk ti anăp klei huĭ srăng mdei hriăm kyua klei ƀun ƀin, luč liê amâodah klei kbưi hŏng lăn hang, sang hră mrâo dôk pŏk sa êlan mdê.

Mơ̆ng dŭm boh sang adôk lu klei kƀah truh kơ wăl anôk hriăm hră, dôk dơ̆ng ƀơ̆ng huă hơĭt kjăp, klei phung hđeh dưi mâo amâo djŏ knŏng jing klei găl hriăm hră jăk hĭn ƀiădah lŏ jing klei đăo knang čiăng lŏ čhuang nao kơ anăp. Sa boh sang hră mrâo drông leh phung hđeh hriăm hră tal êlâo, lehanăn mbĭt hŏng dŭm hruê tal êlâo bi mưng hŏng nai mtô, ƀĭng găp jing dŭm klei čang hmăng dôk rông ba. Hŏng Y-Gió, anăn jing klei čang hmăng srăng jing anôk jưh knang kơ gŏ sang. Hŏng Ngọc Hoa, anăn jing klei čang hmăng srăng jing lĭng kahan răng mgang knông lăn. Bi hŏng lu gŏ sang, klei čang hmăng êdu êun jing anak pô dưi hriăm hră, đĭ hriê kơ prŏng lehanăn mâo sa êdei anăp jăk siam hĭn.