Ti anăp klei yan adiê bi mlih ƀrư̆ hruê ƀrư̆ ktang phĭt, Knơ̆ng bruă sang čư̆ êa čar Dak Lak mrâo ba mdah Asăp mtrŭn mtă kơ dŭm knơ̆ng, dhar bruă leh anăn alŭ wăl čŏng pô gang mkhư̆ angĭn êbŭ, êa lêč, hjan prŏng, klưh hroh lăn, êngăp êa dŭm mlan knhal jih thŭn; mbĭt anăn mprăp hdră mdrơ̆ng hŏng klei adiê không kƀah êa, klei trô̆ msĭn leh anăn pui ƀơ̆ng dliê yan bhang thŭn 2026-2027. Čar mtă brei mlih ktang mơ̆ng hdră mdrơ̆ng êjai jing hdră gang mkhư̆ êlâo, hluê ngă jăk hdră êlan "4 ti anăn"; ksiêm dlăng dŭm krĭng huĭ hyưt êa lêč, klưh lăn, êngăp êlam, ênoh gŏ êsei brei mbĕ đuê̆, anôk êđăp ênang leh anăn êpul êya, kdrăp mnơ̆ng dưi ba nao.

Khua knơ̆ng bruă sang čư̆ êa čar Đỗ Hữu Huy mñă klă: Klei mĭn thŭn anei jing gang mkhư̆ jing phŭn, čŏng ngă mơ̆ng hnưm mơ̆ng kbưi, amâo guôn mâo êa lip amâo dah hjan kơh pŏk ngă. Boh nik brei ksiêm dlăng mtam dŭm anôk leh ksiêm dlăng mâo klei arưp aram klưh hroh, êngăp êa, đru kčĕ msir mgaih mtam dŭm anôk huĭ hyưt djŏ tuôm kơ klei hdĭp mnuih ƀuôn sang.