Phung knuă druh, nai mtô, hđeh hriăm adŭ mjuăt bi hriăm klei thâo kơ bruă lĭng kahan leh anăn răng mgang klei êđăp ênang mbĭt hŏng phung khua kiă kriê čar, dŭm knơ̆ng, dhar bruă bi trông kơ dŭm boh klei hlak mblang leh anăn boh sĭt hlăm hdră mđĭ kyar bruă duh mkra - ala ƀuôn mguôp hŏng bruă lĭng kahan, răng mgang klei êđăp ênang. Sa mta phŭn dưi mñă hlăm mmông mă bruă jing mđĭ kyar bruă duh mkra brei nao mbĭt hŏng bruă mkŏ mkra krĭng wăl răng mgang leh anăn bi kjăp "krĭng mnuih ƀuôn sang răng mgang".

Hluê anăn, mđĭ hnơ̆ng klei hdĭp, bi hrŏ ƀun, rơ̆ng klei êđăp ênang, mjing hdră duh ƀơ̆ng hơĭt kjăp kơ mnuih ƀuôn sang, boh nik ti krĭng knông lăn leh anăn krĭng mnuih djuê ƀiă, amâo djŏ knŏng jing bruă klam mđĭ kyar ƀiădah lŏ đru rơ̆ng kjăp klei êđăp ênang mơ̆ng nah gŭ. Khua bruă Đảng čar Dak Lak Lương Nguyễn Minh Triết mñă klă, brei bi mguôp hdră čuăl mkă mđĭ kyar bruă duh mkra - ala ƀuôn hŏng hdră čuăl mkă bruă lĭng kahan, klei êđăp ênang mơ̆ng phŭn mtam, boh nik dŭm hdră bruă prŏng, êlan dơ̆ng phŭn leh anăn alŭ wăl yuôm bhăn.