Klei ksiêm yap mơ̆ng thŭn dih truh kơ ară anei, ti alŭ wăl čar Dak Lak mâo leh dŭm pluh gưl klei yan adiê ngă, ngă djiê dŭm êtuh čô mnuih leh anăn ngă luč liê dŭm êtuh êbâo êklai prăk. Ti anăp klei anăn, čar Dak Lak bi tŭ ư hdră êlan thŭn anei mprăp êbeh 24 êbâo čô knuă druh, lĭng kahan mbĭt hŏng hlăm brô 35.000 kdrăp mnơ̆ng, kdrăp yua čiăng hmao mbĕ đuĕ mnuih ƀuôn sang leh anăn đru dŏng phung mâo klei truh.

Gĭt gai klei bi kƀĭn, Đại tá Lê Văn Hùng, K’iăng khua Anôk bruă kiă kriê kahan răng mgang knông lăn čar Dak Lak mtă kơ dŭm êpul êya pral ksiêm wĭt hdră mă bruă, păn kjăp anôk phŭn leh anăn ngă jăk hdră êlan "4 tinăn mtam". Mbĭt anăn, rơ̆ng kjăp hdră mprăp klei ngă bruă, mđĭ hdră mjuăt bi hriăm čiăng pral msir mghaih tŭ dưn djăp klei mâo hlăm yan hjan angĭn êbŭ.