Truh ară anei, ênoh bi liê prăk knŭk kna čar Lâm Đồng mâo 30% hdră kčah, ƀiă hĭn hnơ̆ng kah knar kluôm ala jing 39%, dăp tal 31 hlăm ênoh 34 čar,  ƀuôn prŏng. Mta phŭn ênoh bi liê prăk knŭk kna čar Lâm Đồng mâo ƀiă dưi bi mklă lu jing kyua mâo klei gun kpăk hlăm klei tla hnô, ruh mgaih anôk ala; bruă mprăp bi liê adôk êmưt leh anăn bruă dăp bi liê ka djŏ guôp hŏng klei dưi hlue ngă mơ̆ng dŭm hdră bruă.

Čar kčah hdră kñăm truh jih mlan 9 bi liê mâo hlăm brô 65% hdră kčah prăk bi liê. Blŭ hrăm gĭt gai ti anôk bi kƀĭn, Khua Knơ̆ng bruă sang čư̆ êa čar Lâm Đồng Hồ Văn Mười mtă kơ dŭm knơ̆ng, dhar bruă, alŭ wăl ksiêm dlăng grăp hdră bruă, kƀĭn ruh mgaih klei gun kpăk, mđĭ pral hnơ̆ng rŭ mdơ̆ng leh anăn bi liê, mbĭt anăn mđĭ leh anăn msir mgaih bruă klam pô djă akŏ.