Ênai čing kwang ti krah sang kƀĭn ƀuôn Puăn, să Ea Phê, čar Dak Lak hlai mbĭt hŏng klei kdŏ čhuang hưn kơ sa yan knăm mơak dôk giăm truh. Mbĭt hŏng dŭm hruê dôk dlăng kriê đang pla mjing mprăp truh hlăm yan hrui êmiêt, phung thâo mbruă leh anăn êpul kdŏ mmuñ hnêč lŏ hriăm čiăng nao hlăm knăm mơak durian čar Dak Lak âwp anei. Hŏng phung tinei, knăm mơak amâo djŏ knŏng jing hruê knăm boh durian ƀiădah lŏ jing wưng hưn mdah knhuah gru dhar kreh Lăn Dap Kngư truh hŏng phung mah jiăng. Y Čư Ayŭn, mnuih ƀuôn sang ƀuôn Puăn brei thâo, knăm mơak dôk giăm truh kyuanăn grăp čô bi hriăm.

“Mâo knăm mơak durian anăp anei êpul tông čing ƀuôn Puăn pô srăng gĭr nao hgŭm tông čing leh anăn kdŏ čhuang jăk hĭn. Kâo hmăng hmưi knăm mơak durian brei kơ mnuih ƀuôn sang pô mđĭ kyar klei hdĭp mda, pla durian, hmăng hmưi durian mâo ênoh hĭn bi hơĭt klei hdĭp mnuih ƀuôn sang”.

Jing krĭng pla mjing phŭn hŏng 850ha durian, să Ea Phê dlăng kơ knăm mơak durian amâo djŏ knŏng hưn mdah boh mnga ƀiădah lŏ jing klei găl hưn mdah knhuah gru dhar kreh mơ̆ng 23 djuê ana dôk hdĭp ti alŭ wăl. Leh klei tŭ dưn mơ̆ng hruê knăm dhar kreh dŭm djuê ana akŏ thŭn truh kơ ară anei iêo jak êbeh 25.000 gưl čô, alŭ wăl lŏ dơ̆ng mprăp kơ dŭm mta bruă dhar kreh, mnơ̆ng ƀơ̆ng, rang mdah mnơ̆ng dhơ̆ng OCOP leh anăn mđĭ kyar bruă hiu čhưn ênguê êpul êya nao mbĭt hŏng kriê pioh dhar kreh. Hluê si Nguyễn Thị Kim Oanh, khua Bruă sang čư̆ êa să Ea Phê, klei kñăm mơ̆ng alŭ wăl ti knăm mơak srăng jing dŭm klei hưn mdah dhar kreh Bru – Vân Kiều, nao mbĭt hŏng tă hdră mđĭ kyar bruă hiu čhưn ênguê êpul êya.

“Sa ai hŏng knăm mơak dirian gưl tal 1 thŭn 2026 mơ̆ng čar Dak Lak, să Ea Phê ăt mkŏ mjing hdră êlan kơ  dŭm mta bruă mnơ̆ng ƀơ̆ng huă, rang mdah mnơ̆ng dhơ̆ng OCOP leh anăn đa đa bruă đưm mơ̆ng mnuih Bru- Vân Kiều. Klei kñăm mơ̆ng să jing ngă dŭm bĭt êlan leh anăn mđing truh êdei anăp srăng mđĭ lar bruă hiu čhưn ênguê êpul êya hŏng mnuih djuê ana Bru – Vân Kiều”.

Ti să Krông Pač, anôk mkŏ mjing klei bi lông blei durian hlăm knăm mơak, bruă prăp ăt dưi mtrŭt bi pral. Êngao kơ hdră bi lông blei mơ̆ng čar, alŭ wăl lŏ mkŏ mjing thiăm 5 bruă sa ai mơ̆ng krah mlan 8 truh akŏ mlan 9. Lại Đức Đại, Khua Bruă sang čư̆ êa să Krông Pač brei thâo, gru hmô dôk dưi hmăng hmưi mkŏ mjing thiăm klei bi mguôp plah wah phung pla mjing, knơ̆ng bruă hrui blei leh anăn ba čhĭ, mbĭt anăn đru mkŏ mjing anăn knăl durian Dak Lak hluê si boh tŭ yuôm.

“Să hmei hmăng hmưi lu kơ klei bi lông blei mnơ̆ng dhơ̆ng ti đang durian, anei jing klei găl pŏk hdră êlan đĭ kyar bruă anei hluê si klei mkă mjing ăt msĕ mơh jing klei găl čiăng hưn mdah anăn knăl durian Krông Pač leh anăn wăt ti Dak Lak.”

Knăm mơak Durian Dak Lak gưl tal 1 srăng mkŏ mjing mơ̆ng hruê 15/8 – 2/9 hŏng dŭm mta bruă dhar kreh, hiu čhưn ênguê, mtrŭt mđĭ klei mnia mblei leh anăn mkŏ klei ba čhĭ boh mnga. Anei jing gưl tal êlâo knăm mơak dưi mkŏ mjing hnơ̆ng gưl čar, bi klă klei mlih mơ̆ng sa knăm mơak alŭ wăl jing knăm mơak bruă phŭn. Trần Hồng Tiến, Khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak hmăng hmưi.

“Hmei hmăng hmưi ti Knăm mơak tal anei srăng drông êbeh 300.000 gưl čô tuê hiu čhưn ênguê hriê ti Dak Lak, êngao kơnăn, srăng đru mđĭ anăn knăl durian Dak Lak ti anôk mnia mblei hlăm leh anăn êngao lăn čar, mkŏ mjing anăn knăl mdê. Srăng mâo lu mta bruă nah êngao čiăng hưn mdah dhar kreh, anak mnuih mơ̆ng čar Dak Lak, mkŏ mjing ai iêo jak, klei kñăm čiăng iêo jak phung tue, bi lar boh tŭ durian Dak Lak truh hŏng kluôm ala čar leh anăn dŭm ala čar dlông rŏng lăn”.

Dak Lak ară anei mâo giăm 45.000 ha durian, mâo êbeh 20% ênhă durian hlăm kluôm ala. Thŭn 2025, ênoh ba čhĭ mâo hlăm brô1,1 êklai USD, ba durian jing sa hlăm dŭm bruă phŭn ti alŭ wăl. Ƀiăđah nah tluôn dŭm ênoh mrô anăn jing hdră duh ƀng mơ̆ng dŭm êbâo gŏ sang, jing klei bi mlih mơ̆ng lu ƀuôn sang leh anăn ai dưi kriê pioh dhar kreh djuê ana.

Knăm mơak durian Dak Lak gưl tal 1 kyuanăn mâo lu boh tŭ dưn hĭn kơ sa hdră bruă hưn mdah boh mnga. Anăn jing wơng čiăng mkŏ klei mkra mjing hŏng anôk mnia mblei, bi mguôp mđĭ kyar bruă hiu čhưn ênguê hŏng djă pioh dhar kreh, ƀrư̆ ƀrư̆ mkŏ mjing Dak Lak jing anôk truh mơ̆ng boh mmih leh anăn wăl anôk čing čhar jăk. Êjai ênai čing kwang ti krah yan durian ksă ăt jing mmông Lăn Dap Kngư mơĭt truh hŏng phung mah jiăn hlăm leh anăn êngao lăn čar klei hưn kơ sa alŭ wăl thâo bi lar klei găl bruă lŏ hma, kriê pioh dhar kreh leh anăn mđing truh đĭ kyar hơĭt kjăp./.