Bruă sang čư̆ êa čar Dak Lak mrâo mkŏ mjing klei kƀĭn ksiêm wĭt bruă hluê ngă dŭm bruă klam kreh knhâo mrâo mrang, mlih mrâo mbruă leh anăn bi mlih mrô ti alŭ wăl, kñăm ruh mgaih klei dleh dlan čiăng rơ̆ng kơ dŭm bruă klam mâo leh. Wưng thŭn 2023 - 2026, čar ngă 21 bruă klam kreh knhâo leh anăn mrâo mrang gưl čar hŏng ênoh prăk êbeh 437 êklai prăk, kñăm kơ bruă lŏ hma kdrăp mrâo, mrka mjing, êa drao leh anăn bi mlih mrô. Mơ̆ng thŭn 2021 truh kơ ară anei, alŭ wăl ăt ngă leh 19 hdră phŭn kơ klei hưn mthâo mrâo mrang leh anăn bruă mkŏ mkra mrô. Knŏng thŭn 2026, čar dap leh hlăm brô 300 êklai prăk čiăng ngă dŭm mdră msĕ si mđĭ hnơ̆ng kdăp kƀĭn online truh kơ gưl să, bi mlih mrô klei čih pioh leh anăbn mkŏ mjing tur knơ̆ng mrô đru kơ klei gĭt gai, răng mgang klei êđăp ênang.

Hồ Thị Nguyên Thảo, k’iăng khua Bruă sang čư̆ êa čar Dak Lak mñă kơ dŭm knơ̆ng, dhar bruă, alŭ wăl bi klă bruă klam, kñăm ruh mgaih klei dleh kpăk, mđĭ hnơ̆ng ai dưi leh anăn pŏk mlar dŭm gru hmô.

“Grăp dhar bruă, gưl bruă srăng bi klă bruă klam hluê ngă hdră mtrŭn mrô 57 mơ̆ng dhar bruă pô leh anăn mâo hdră êlan ƀhĭ klĭ hŏng 8 klei tĭng mkă prŏng kơ klei kreh knhâo mrâo mrang, mlih mrâo mbruă mâo leh bruă Đảng čar, Êpul khua gĭt gai bi klă leh anăn Bruă sang čư̆ êa čar jao leh. Êngao kơdŭm hdră êlan mơ̆ng gưl dlông, ya hdră êlan čiăng mâo hưn mdah hŏng êpul gơ̆ng ba mdah, mđing kơ klei hưn mthâo mrâo mrang, kdrăp yua kơ nah gŭ. Ktuê dlăng grăp hruê kăm, dŭm bruă klam srăng ngă djŏ hdră kčah čiăng bi leh dŭm ênoh čuăn”.

Djŏ tuôm hŏng klei mlih mrô, knơ̆ng bruă Kreh knhâo leh anăn mrâo mrang Dak Lak mă leh bruă hŏng sang hră gưl prŏng Lăn Dap Kngư, tŭ ư mtrŭt mđĭ bi hriăm thạc sĩ, nai prŏng hlăm dŭm bruă hưn mthâo mrâo mrang, klei čih pioh leh anăn kdrăp sinh học, nao mbĭt hŏng mtô ksiêm duah, hriăm bruă ti dŭm anôk bruă mrâo mrang mơ̆ng čar. Nai Prĭn, Đinh Hữu Hùng, Anôk bruă mtô mdrao mgŭn, sang hră gưl prŏng lkd lač dŭm klei ksiêm duah čiăng nao klă hŏng boh sĭt alŭ wăl čiăng ba wĭt boh tŭ dưn kơ mnuih ƀuôn sang.

“Kâo mĭn dŭm mta phŭn ti anăp anei, tơdah Knơ̆ng bruă kreh knhâo mrâo mrang blei mơ̆ng sang hră, srăng nao klă hŏng boh sĭt. Leh bi mŭt mbĭt ăt srăng nao klă hŏng boh sĭt mơ̆ng nah Ngŏ čar. Leh anăn hlăm anăn mâo dŭm mta phŭn ară anei hlăm hdră mtrŭn mrô 72 ăt bơ̆k bâo kơ klei mkra mlih amâodah đĭ kyar hŏng bruă mdrao mgŭn. Drei nao klă hŏng klei anăn srăng dưi ba wĭt boh tŭ dưn kơ mnuih ƀuôn sang.”

Hluê si Phạm Gia Việt,  k’iăng khua Knơ̆ng bruă kreh knhâo mrâo mrang Dak Lak, bruă hluê ngă hdră mtrŭn mrô 57 mdưm klei čuăn lu hĭn hŏng bruă mtô mjuăt mnuih mă bruă đru kơ mlih mrô leh anăn mđĭ kyar bruă duh mkra ala ƀuôn.

"Hlăm hdră mtrŭn mrô 57, mlih mrô leh anăn mtô knuă druh kơ mlih mrô hlăm wưng kơ anăp srăng mtrŭt mđĭ ktang mta phŭn anei. Leh anăn boh nik hdră ruah dŭm mta phŭn čiăng đru mđĭ kyar bruă duh mkra ala ƀuôn, đru ba klei đĭ kyar mâo 2 ênoh mrô mơ̆ng čar Dak Lak.

Mbĭt anăn, Êpul kiă kriê anôk bruă lŏ hma kdrăp mrâo ƀuôn prŏng Hồ Chí Minh bi mguôp hŏng Knơ̆ng bruă kreh knhâo mrâo mrang Dak Lak mtrŭt mjhar klei bi lông Čô̆ kơ bruă mlih mrâo bruă hlăm bruă lŏ hma kdrăp mrâo thŭn 2026 alŭ wăl Lăn Dap Kngư hŏng akŏ “Bruă lŏ hma dar - mkŏ mjing êdeh anăp mtah”. Klei bi lông mđing tui duah dŭm gru hmô ba yua mrô leh anăn kdrăp sinh học čiăng mđĭ ênoh boh mnga, mđĭ kyar bruă lŏ hma hơĭt kjăp. Klei pah mni mrô 1 kơ grăp čô, knơ̆ng bruă mâo êbeh 150 êklăk prăk, dŭm hdră lŏ mâo klei grăl đru 400 êklăk prăk čiăng mjut mjing leh anăn đĭ kyar.

Nguyễn Thanh Hiền, k’iăng khua êpul bruă kiă kriê anôk bruă lŏ hma kdrăp mrâo ƀuôn prŏng Hồ Chí Minh brei thâo, klei bi lông jing klei găl mkŏ ai dưi plah wah ƀuôn prŏng Hồ Chí Minh leh anăn dŭm čar Lăn Dap Kngư, mtrŭt mđĭ klei mlih mbruă hlăm bruă lŏ hma.

“Hlăm wưng ară anei, hŏng hdră mtrŭn mrô 57 drei mâo klei găl mtrŭt mđĭ ba yua klei kreh knhâo mrâo mrang, hlăm anăn mâo dŭm mta čŏng ngă bruă hlăm mkra mjing, ba yua AI, leh anăn mrô krĭng pla mjing čiăng mđĭ hnơ̆ng jăk boh mnga. Kyuanăn hmei bi mguôp hŏng knơ̆ng bruă kreh knhâo mrâo mrang Dak Lak ngă klei bi lông anei čiăng duah dŭm klei mĭn đru kơ diñu đĭ kyar, mđĭ hĭn hdră pô, boh nik jing ba yua hlăm boh sĭt čiăng mkŏ mjing dŭm anôk bruă ktang čiăng mđĭ ênoh boh mnga hrui êmiêt leh anăn ba čhĭ.”

Hŏng bruă mtrŭt mđĭ klei kreh knhâo mrâo mrang, mlih mbruă leh anăn mlih mrô, Dak Lak mbĭt hŏng dŭm čar Lăn Dap Kngư ƀrư̆ ƀrư̆ mkŏ mjing boh kdrŭt mrâo kơ klei đĭ kyar, đru ngă mta kñăm đĭ kyar prak, hơĭt kjăp hlăm ênuk mrâo.