Gŏ sang amai Y Hiền ti alŭ Kon Vơng Kia, să Măng Đen ăt msĕ si hŏng lu gŏ êsei mkăn, klei hdĭp êlâo dih knang hlăm dŭm sao lŏ, yan giăm hrui wiă dleh dlan kƀah mnơ̆ng ƀơ̆ng. Knuă druh, đảng viên nao truh ti sang ktrâo lač klei pla mjing djam doh, kriê dlăng ana pla mjing, hgŭm hlăm gru hmô bi hgŭm grăp knhuang bi mlih hdră ngă klei mĭn ñu. Mơ̆ng pla pioh ƀơ̆ng, amai Y Hiền bi mluh jing pla čiăng čhĭ leh anăn hgŭm hiu čhưn ênguê:

 “Kyua mâo khua ƀuôn, Khua dlăng bruă Đảng ktrâo lač pla mjing kphê, leh anăn hgŭm pla mjing djam tam, mơ̆ng anăn gŏ sang đĭ kyar ƀiă.”

Ti Kon Vơng Kia, klei bi mlih amâo djŏ msĕ si klei bluh mâo ôh ƀiădah lar kluôm. Tơdah ƀuh mnuih sĭt, bruă sĭt, boh tŭ dưn sĭt, mnuih ƀuôn sang đăo knang leh anăn hlue ngă. Hlăm dŭm boh sang mrâo, dŭm klei bhiăn djuê ana ăt dưi mđĭ lar.

Ară anei alŭ Kon Vơng Kia mâo 3 êpul tông čing hŏng êbeh 90 čô, hlăm anăn mâo sa êpul tông čing hđeh 31 čô. Dŭm adŭ mtô dưi pŏk amâo mă prăk ôh, kyua phung đảng viên mtô. Čing čhar amâo djŏ knŏng pioh čiăng hdơr ôh ƀiădah pioh čiăng hdĭp. Dŭm mlam knhal tuč, ênai čing jing mnơ̆ng dhơ̆ng hiu čhưn ênguê, ba prăk hrui wĭt kơ mnuih ƀuôn sang. Mơ̆ng anăn, sa adŭ phung ngă lŏ hma mrâo mphŭn mâo – phung ngă bruă hiu čhưn ênguê.

Đảng viên A Đruông (37 thŭn) pô tal êlâo čhĭ sa kdrêč lăn čiăng mkra homestay tuôm ngă kơ lu mnuih ka jăk jhŏng ngă, kyua ñu tuôm amâo tŭ jing hŏng ana kphê, ăt dôk đuôm nư. Sang krum dưi mkra mjing anôk dôk jưh, ăt kriê pioh wăl hdĭp mda gŏ sang. Hlăm sang, 8 rĭng čing hŏng 22 boh dưi yuôl yuôm bhăn čiăng yăl dliê kơ klei dhar kreh pô. Ayŏng A Đruông brei thâo, ngă bruă hiu čhưn ênguê amâo djŏ jing mnia blei ôh ƀiădah lŏ jing kriê pioh bruă, kriê pioh ƀuôn:

 “Đảng viên amâo huĭ ôh kơ bruă mđĭ kyar bruă duh mkra ƀiădah amâo mâo mnga, msĕ si pô amâo tŭ jing, amâo huĭ ôh. Pô ngă yơh, đảng viên brei bi hmô kơ mnuih ƀuôn sang tui hlue. Bi hmô êlâo snăn pô lač mnuih ƀuôn sang srăng hmư̆. Đảng viên ăt klam bruă kriê dlăng dŭm êpul gŏ êsei. Grăp đảng viên kriê dlăng pă gŏ êsei. Hlăm êpul anăn, ƀuh ară anei đĭ kyar leh. Dua gŏ êsei jing mnuih khua thŭn, dua gŏ êsei adôk jing êdam êra. Grăp gŏ êsei mprăp ngă homestay. Mnuih ƀuôn sang hlăm êpul gŏ êsei anăn ăt mâo klei thâo săng bi mlih mơh”.

Ară anei alŭ  Kon Vơng Kia mâo 8 gŏ êsei ngă homestay, brei ƀuh Kon Vơng Kia dôk hlue sa êlan ngă bruă mrâo. Khădah snăn, čiăng kơ hiu čhưn ênguê jing hdră duh ƀơ̆ng kjăp leh anăn dưi kriê pioh knhuah dhar ba yua, bruă klam phung đảng viên amâo djŏ knŏng ngă êlâo ôh ƀiădah jing pô hrăm mbĭt sui. Grăp čô đảng viên klam bruă kriê dăng 4 truh 5 gŏ êsêi, ktrâo lač mkra mjing êjai, ktuê dlăng êjai, đru ruh mgaih klei dleh dlan. Hdră ngă giăm mnuih ƀuôn sang đru kơ hdră êlan amâo kpăk đuôm ôh.

Gŏ sang A Hùng, Khua ƀuôn Kon Vơng Kia, să Măng Đen bi liê 2 homestay hŏng ênoh bi liê dŭm êtuh êklăk prăk, hlăm anăn mâo prăk čan knơ̆ng prăk. Ayŏng A Hùng brei thâo, êlâo dih lu phung êdam êra hui mŭt Đảng, ƀiădah leh mŭt bi kƀĭn, dưi hmư̆ lu klei hâo hưn, hdră ngă bruă, diñu ƀrư̆ bi mlih klei thâo săng:

 “Hŏng phung êdam êra êdah kdlưn, bruă Đảng srăng mjing klei găl bi kƀĭn hŏng phung đảng viên. Mơ̆ng anăn, phung êdam êra srăng dưi hriăm thiăm kơ đảng leh anăn hmư̆ lu hdră êlan kơ klei mđĭ kyar bruă duh mkra- ala ƀuôn. Ƀrư̆ ƀrư̆ phung êdam êra anăn thâo săng kơ đảng êlan hĭn, čiăng hgŭm hlăm bruă Đảng.”

Lu alŭ, ƀuôn ti să Măng Đen dôk tă hdră hiu čhưn ênguê êpul êya mguôp hŏng dhar kreh djuê ana leh anăn lŏ hma yua kdrăp mrâo. Mơ̆ng sa krĭng lăn ƀun, dŭm alŭ, ƀuôn ti Măng Đen dôk mâo lu klei bi mlih. Kluôm să Măng Đen mâo 48 êpul bruă Đảng hŏng 800 čô đảng viên. Bruă Đảng să bi mklă brei mkŏ mjing kjăp ktang, đĭ kyar đảng viên kơ ênoh leh anăn hnơ̆ng, ênoh đảng viên grăp mlan đĭ 3-4%. Nguyễn Ngọc Sơn,  K’iăng Khua dlăng bruă Đảng să Măng Đen brei thâo, brei mđĭ hnơ̆ng klei bi kƀĭn bruă đảng leh anăn bruă klam bi hmô: “Ya bruă dleh snăn knuă druh, đảng viên nao êlâo”. Hlue si Nguyễn Ngọc Sơn, tơdah đảng viên bi mklă bi hmô, jhŏng ngă, thâo ngă leh anăn ngă tŭ dưn snăn mnuih ƀuôn sang đăo knang leh anăn hlue ngă:

 “ Bi mklă bruă mkŏ mjing Đảng, đảng viên snăn bruă Đảng să ăt mâo leh hdră mtrŭn thơ̆ng, jao hnơ̆ng kčah kơ êpul bruă Đảng, mđĭ kyar đảng viên hlăm jih gưl, grăp thŭn. Bruă Đảng să đĭ kyar kjăp čiăng gĭt gai bruă klam kđi čar ti alŭ, mđĭ klei thâo gĭt gai kluôm ti alŭ. Knuă druh, đảng viên brei nao êlâo, ngă jăk čiăng kơ mnuih ƀuôn sang tui hlue. Êpul knuă druh hlăm alŭ ăt ruah leh klă, phung mâo klei găl, pral kdal, jhŏng blŭ, jhŏng ngă, gĭr ngă hlăm djăp mta bruă ti alŭ, ƀuôn, ngă jăk mơh”.