Klei hŭi hyưt mơ̆ng klei klưh hroh kyua angĭn êbŭ mrô 13 thŭn 2025 ăt dôk mâo nanao. Dŭm êbâo m3 lăn leh anăn boh tâo mơ̆ng čư̆ Phương Mai klưn lăm jih 3 boh sang, ngă kơ sa čô djiê, 1 čô êka leh anăn lu gŏ sang mbĕ đuĕ mjêč. Lê Văn Phụng, mnuih ƀuôn sang ti alŭ 9, ƀuôn prŏng Quy Nhơn hmăng hmưi, mnư̆ gang klưh hroh lăn jing Khil Mngang răng mgang wăl ƀuôn sang ti anăp dŭm boh klei yan adiê amâo mâo jăk.

“Mjêč êdi kyua yan hjan hlĭm giăm truh leh. Tơdah amâo mâo hmao lŏ truh ti yan hjan srăng tuôm hŏng lu klei dleh dlan. Mnuih ƀuôn sang hmăng hmưi Knŭk kna bi leh mnư̆ kjăp brei mnuih ƀuôn sang hơĭt ai tiê.”

Leh mâo ngăn prăk, Bruă sang čư̆ êa ƀuôn hgŭm Quy Nhơn ngă hdră êlan rŭ mdơ̆ng mnư̆ gang klưh hroh mơ̆ng čư̆ ti Hải Minh hŏng ênoh duh bi liê êbeh 10,2 êklai prăk. Hdra anei mâo mtih gang 65m, dlông 4m, hŏng mnuôr mđoh êa  mơ̆ng jơ̆ng čư̆ truh ti êa ksĭ čiăng bi hrŏ klei kpĭ hnoh êa leh anăn klei arưp klưh hroh hlăm yan hjan. Nguyễn Quốc Hùng, bi ala anôk brei thâo čiăng rơ̆ng djŏ hdră kčah, phung ngă bruă tiŏ nao êpul jêñ jêñ mơ̆ng hlăm brô 20 čô mă bruă mbĭt hŏng lu masin, mkŏ mjing klei ngă bruă jêñ jêñ.

"Mnơ̆ng yua mơ̆ng êa ksĭ, plao ksĭ truh ti krŭn ksĭ, hlăm klei dŭ mdiăng truh kơ anôk bi kƀĭn mâo lu bĭt êlan điêt kyuanăn phung mă bruă yua êdeh drŭt dŭ wăt hruê mlam čiăng mâo mnơ̆ng yua, mdơ̆ng mtih kjăp čiăng hnưm bi leh hdră.”

Thŭn 2026, čar Gia Lai mđing ai dưi duh bi liê kơ dŭm hdră bruă gang mkhư̆ leh anăn msir boh jhat yan adiê ti lu alŭ wăl. Bi ti ƀuôn hgŭm Quy Nhơn dưi dăp leh êbeh 52m7 êklai prăk čiăng mkra mđĭ, rŭ mdơ̆ng dŭm anôk hmăi djŏ kyua yan adiê, truh kơ ară anei dưi bi leh 5 hdră bruă sang hră, anôk mă bruă. Hlăm anănm hdră rŭ mdơ̆ng mtih gang klưh hroh ti Hải Minh ngoài dưi bi klă jing bruă phŭn čiăng bi leh êlâo kơ yan hjan čiăng răng mgang mnuih ƀuôn sang ti gŭ jơ̆ng čư̆ Phương Mai. Hluê si Nguyễn Đức Toàn, khua Bruă sang čư̆ êa ƀuôn hgŭm Quy Nhơ, hdră anei ară anei dưi bi leh 80% ênoh bruă. Bruă sang čư̆ êa alŭ wăl dôk bi mguôp hŏng dŭm êpul ngă bruă, êdeh êdâo yua čiăng bi leh hdră djŏ hdră kčah.

"Anôk bruă bi kƀĭn mnuih mă bruă, dŭm kdrăp yua, masin čiăng mtrŭt bi pral klei ngă bruă. Truh ară anei dưi ngă leh hlăm brô 80% ênoh bruă. Bruă sang čư̆ êa ƀuôn hgŭm gĭt gai leh bi pral čiăng êlâo kơ yan hjan hlĭm dưi bi leh bruă anei, rơ̆ng kơ klei êđăp ênang kơ ngăn dŏ leh anăn asei mlei mnuih ƀuôn sang.

Hŏng klei gĭr bi leh êlâo kơ yan hjan, hdră bruă amâo djŏ knŏng msir boh jhat yan adiê ƀiădah lŏ đru răng mgang asei mlei, ngăn dŏ mơ̆ng mnuih ƀuôn sang  ti gŭ jơ̆ng čư̆ Phương Mai, đru kơ mnuih ƀuôn sang ti ƀuôn hgŭm Quy Nhơn, čar Gia Lai bi hơĭt klei hdĭp ti anăp yan adiê amâo mâo jăk ară anei.