Aguah hruê 11/11, ti ƀuôn hgŭm Quy Nhơn Nam, čar Gia Lai, kyua hjan prŏng, dŭm pluh met êbuh lăn boh tâo mbĭt hŏng ana kyâo prŏng hmăi truh kơ ktuê êlan dơ̆ng prŏng mrô 1D. Lăn lŭ, boh tâo lĕ ti êlan ngă gun kpăk klei găn êrô mkŏ hŏng čar Dak Lak. Leh anăn mtam, anôk bruă djŏ tuôm čar Gia Lai iêô mtrŭt êpul êya, êdeh êdâo leh anăn kdrăp mnơ̆ng thơ̆ng kơ bruă nao msir mghaih lăn boh tâo; mbĭt anăn kđăl ƀăng, ktrâo lač kơ êdeh êdâo găn êrô hluê êlan mkăn. Ăt ti êlan dơ̆ng prŏng mrô 1D, êlan kčŭn čư̆ Quy Hòa dưi kđăl ƀăng, amâo brei êdeh êdâo găn êrô kyua huĭ hyưt klưh lăn.

Êpul đru dŏng mkŏ mjing giăm dŭm anôk huĭ hyưt, mprăp đru dŏng, mprăp đru mbĕ đuê̆ mnuih ƀuôn sang. Mơ̆ng tlam 11/11, dŭm êbâo čô hđeh sang hră ti ƀuôn hgŭm Quy Nhơn Bắc leh anăn dŭm să Canh Vinh, Tuy Phước brei mdei hriăm kyua hjan prŏng, êa lip đĭ, ngă huĭ hyưt hlăm êlan nao sang hră.

Hjan prŏng sui 2 hruê êgao ngă kơ êa ti lu hnoh krông, êa hnoh ti nah Ngŏ čar Dak Lak đĭ, ngă êngăp êa lu krĭng mnuih ƀuôn sang dôk. Ti dŭm să Xuân Lãnh leh anăn Đồng Xuân, bruă sang čư̆ êa alŭ wăl pral mbĕ đuê̆ dŭm êtuh gŏ sang leh anăn mnơ̆ng dhơ̆ng truh kơ anôk êđăp ênang, mbĭt anăn kwang dar dŭm anôk êngăp êa ti êlan dơ̆ng prŏng mrô 19C. Ti dŭm să Tuy An Tây leh anăn Đồng Xuân, dŭm boh sang hră brei phung hđeh mdei hriăm. Êpul bruă djŏ tuôm dưi dăp ti dŭm anôk huĭ hyưt, mprăp mdrơ̆ng hŏng dŭm boh klei bluh mâo.

Knơ̆ng bruă kreh knhâo hưn brei răng klei huĭ hyưt prŏng mâo klei êa lip lêč, klưh hroh lăn ti krĭng čư̆ čhiăng leh anăn êngăp êlam ti dŭm krĭng êlam ktuê krông, hnoh krông krĭng nah Ngŏ čar Dak Lak. Knŭk kna leh anăn anôk bruă djŏ tuôm mtă kơ mnuih ƀuôn sang mđĭ klei răng, amâo găn dŭm krĭng êngăp êlam, êa đoh ktang, boh nik jing dŭm anôk klưh hroh ti krông, hnoh krông čiăng rơ̆ng klei êđăp ênang.

Hjan prŏng sui ti lu anôk ti čar Quảng Ngãi ngă êngăp êa, klưh hroh lăn, bi ktlah lu êlan klông. Ti să Sơn Tây, êlan Trường Sơn Ngŏ mâo 3 anôk klưh hroh, ngă kpăk êlan mơ̆ng hruê 11/11. Ti să Phước Giang, jih 10 alŭ mâo klei êngăp êa, dŭm anôk êa đĭ êbeh 1.5 met. Dŭm êpul êya đru kơ mnuih ƀuôn sang ti dŭm krĭng êngăp êa đĭ nao kơ anôk êđăp ênang.

Ti să Ngọc Linh, bruă sang čư̆ êa alŭ wăl mjêč mbĕ đuê̆ 115 gŏ sang hŏng 393 čô mnuih nao kơ anôk êđăp ênang. Klei huĭ hyưt hĭn jing krĭng Đăk Rế mâo lu anôk klưh hroh hlăm kbuôn čư̆, arưp aram truh kơ 96 gŏ êsei mnuih ƀuôn sang dôk ti gŭ jơ̆ng čư̆. Jih jang gŏ êsei mnuih ƀuôn sang anei dưi mbĕ đuĕ dôk ti sang bi kƀĭn Knơ̆ng bruă sang čư̆ êa să.