Leh dŭm gưl adiê hjan prŏng, hnoh êa ti gŭ kban mŭt hlăm ƀuôn Thanh Sơn, să Čư̆ A Thai đoh ktang. Vi Văn Trượt, Khua dlăng bruă Đảng hlŏng klam ngă Khua ƀuôn hmao truh čiăng mă rup, leh anăn hưn mthâo hlăm êpul Zalo, mtă kơ mnuih ƀuôn sang răng tơdah găn êrô. Kkiêng thŭn 1995, mâo hnơ̆ng hriăm cử nhân luật leh anăn tuôm ngă bruă ti gưl să, leh bi mŭt mbĭt, ayŏng Trượt wĭt ngă bruă ti ƀuôn Thanh Sơn dưi bi mŭt mơ̆ng 3 ƀuôn hđăp, hŏng 401 gŏ sang hŏng hlăm brô 1.760 čô mnuih, lu jing mnuih djuê ƀiă.

Alŭ wăl prŏng, mnuih ƀuôn sang lu ngă kơ khua ƀuôn mda asei čiăng duah hdră ngă pral hĭn ƀiădah ăt siă suôr hŏng mnuih ƀuôn sang. Leh êbeh 2 mlan pŏk ngă bruă klam mrâo, ayŏng Trượt mkŏ mjing êpul Zalo bi mguôp êbeh 200 gŏ sang, krơ̆ng kjăp êpul mơ̆ng bruă kđi čar, bi mguôp Fanpage Facebook leh anăn loa mtô mblang čiăng bi mlih klei hâo hưn. Ñu lŏ ktrâo lač kơ mnuih ƀuôn sang yua VNeID, bi mguôp hră ênua yang ƀuôn, hră ênua mdrao mgŭn leh anăn hluê ngă bruă knŭk kna online. Khădah snăn, tơdah mâo klei truh, ñu ăt nao truh kơ grăp gŏ sang:

“Ară anei, bruă ti ƀuôn lu snăk leh anăn brei klă klơ̆ng nao truh čiăng thâo ƀuh klei dleh dlan mơ̆ng mnuih ƀuôn sang si ngă snăn kơh dưi bi leh bruă; leh anăn brei mơĭt klei hâo hưn kơ gưl dlông amâodah tŭ mă hră mơar brei mâo hlăm maĭ tĭng jih. Ară anei, kâo ăt dôk ba yua čiăng ktrâo lač kơ mnuih ƀuôn sang bi mguôp hră mơar hlăm VneID čiăng kơ mnuih ƀuôn sang bi mlih ƀrư̆ ƀrư̆”.

Leh bi mŭt mbĭt, alŭ D’Rốc, să Čư̆ A Thai mâo êbeh 500 gŏ sang, hŏng 8 djuê ana hdĭp mda. Nguyễn Công Quân, pô tuôm mâo leh lu thŭn ngă khua alŭ leh anăn Khua kiă kriê Êpul hgŭm kahan hđăp, lŏ mâo mnuih ƀuôn sang đăo knang jao bruă klam khua alŭ mrâo. Thâo klă grăp krĭng mnuih ƀuôn sang dôk, dŭm anôk huĭ srăng klưh hroh leh anăn dŭm kdrêč êlan kreh êngăp êa tơdah hjan prŏng, ñu pral ksiêm dlăng, hưn brei răng čiăng kơ mnuih ƀuôn sang gang mkhư̆.

“Msĕ si Adŭ bruă duh mkra mơĭt klei hâo hưn kơ klei đăo knăl yan adiê snăn pô ba mtruh mtam, hưn mdah čiăng kơ mnuih ƀuôn sang thâo klă klei mâo. Hlăm bruă pla mjing srăng găl ênưih tơdah pô thâo klă klei hâo hưn djŏ klă. Tơdah čiăng rah mdiê snăn arăng mjêč rah mtam čiăng kơ asăr đĭ jing amâo dah lŏ kdŭn hĕ”.

Mơ̆ng 23 boh ƀuôn hđăp, să Čư̆ A Thai mkŏ dăp adôk 13 boh ƀuôn, mâo 8 čô khua ƀuôn leh anăn 5 čô khua bruă Đảng hlŏng klam ngă khua ƀuôn. Jih jang khua ƀuôn leh mkŏ dăp jih jang hriăm leh gưl tlâo kơ dlông, dưi yua maĭtĭng leh anăn đĭng blŭ thâo mĭn. Leh mkŏ dăp mnuih mă bruă, să lŏ dơ̆ng bi kjăp klei thâo hâo hưn, msir klei amâo thâo bi djŏ, ksiêm dlăng gŏ êsei ƀun, kriê dlăng klei mkŏ mkra leh anăn răng mgang klei êđăp ênang; mbĭt anăn bi kjăp klei bi mguôp plah wah khua ƀuôn hŏng êpul bruă Đảng nah gŭ, Anôk bruă mặt trận, kahan ksiêm să leh anăn dŭm êpul êya. Nguyễn Hữu Khóa, kiăng khua bruă Đảng, kiăng khua knơ̆ng bruă sang čư̆ êa să Čư̆ A Thai brei thâo, êpul anei lŏ đru kơ mnuih ƀuôn sang djŏ guôp hŏng hdră mghaih msir bruă knuă hlăm kdrăp mrô:

“Phung khua ƀuôn leh bi mŭt mbĭt mâo klei thâo săng, ba yua đĭng blŭ thâo mĭn leh anăn dŭm êpul Zalo, dŭm kdrăp čiăng thâo klă bruă knuă. Êpul khua ƀuôn ăt hur har bi hgŭm hŏng phung hlăm êpul bi mlih mrô đru kơ mnuih ƀuôn sang bi mŭt klei hâo hưn hlăm tài khoản VneID, bruă knŭk kna online, tĭng tla online, dưn yua kdrăp hriăm online”.

Ti hnơ̆ng kluôm čar Gia Lai, ênoh alŭ, ƀuôn, êpul ƀuôn sang hrŏ leh êbeh 48% leh mkŏ dăp. Ară anei čar mâo 1.400 čô khua alŭ, ƀuôn, êpul ƀuôn sang. Hlăm anăn 183 čô mbĭt anăn păn ngă Khua bruă Đảng nah gŭ. Klă klơ̆ng, mâo 10 čô mâo hnơ̆ng hriăm êdei kơ gưl prŏng, mâo 1 čô nai prĭn leh anăn 9 čô mâo hnơ̆ng hriăm êdei kơ gưl prŏng mkăn. Nguyễn Thanh Vũ, K'iăng khua knơ̆ng bruă kiă kriê bruă knuă čar brei thâo, alŭ wăl dôk gĭr bi kjăp hnơ̆ng thâo, kơhưm lehanăn klei thâo mlih mrô mơ̆ng êpul khua alŭ, ƀuôn, êpul ƀuôn sang čiăng kơ êpul khua alŭ, ƀuôn, êpul ƀuôn sang ngă djŏ klei čiăng bruă klam boh klei mrâo:

“Leh klei mkŏ dăp, ƀrư̆ hruê ƀrư̆ êpul anei srăng dưi bi mklă ƀrư̆ ƀrư̆. Hluê si klei čiăng mơ̆ng Anôk bruă mkŏ mjing gưl dlông leh anăn mơ̆ng čar snăn čiăng klei thâo kơ kdrăp hâo hưn mrâo mrang diñu brei pral êdi. Ară anei anôk bruă điện tử mơ̆ng čar mkŏ hŏng ƀuôn hgŭm, brei thâo săng kơ kdrăp hâo hưn mrâo mrang kơh dưi mŭt hlăm phần mềm anei. Kyua anăn, klei akâo jing diñu brei thâo săng kơ klei bi mlih mrô.”

Leh bi mŭt mbĭt, dŭm alŭ wăl prŏng hĭn dôk mdưm ti mra khua ƀuôn, khua êpul mnuih ƀuôn sang lu bruă klam hĭn. Tơdah dưi bi mklă kơ klei thâo leh anăn mlih mrâo hdră ngă bruă, diñu srăng lŏ jing kdrông amâo dưi kƀah plah wah bruă sang čư̆ êa hŏng mnuih ƀuôn sang./.