Tui si klei čuăl mkă, bruă anei prŏng hlăm brô 200ha, hŏng ênoh prăk duh bi liê jih jang truh 139 êklai prăk, lehanăn srăng mă bruă hlue bi gưl djŏ guôp hŏng ai dưi duh bi liê, lehanăn klei găl mơ̆ng bruă knuă. Tui si phung duh bi liê, bruă anei srăng kčưm dơ̆ng mơ̆ng pla mjing hlŏng truh kơ mkra mjing êa drao ti hnơ̆ng jăk, ba yua kdrăp mă bruă ênuk mrâo kñăm dưi mâo dŭm mta êa drao djăp ênoh čuăn, lehanăn klei čiăng hlăm anôk čhĭ mnia. Lê Minh Thông, Khua knơ̆ng bruă sang čư̆ êa ƀuôn hgŭm Vĩnh Thạnh brei thâo, Đan Sâm jing ana êa drao tŭ dưn, dưi ba yua lar ƀar hlăm hdră mdrao mgŭn đưm, lehanăn srăng mđĭ lar prŏng.

“Bruă anei truh hŏng alŭ wăl pŏk sa klei găl mrâo kơ bruă bi mlih mnơ̆ng pla mjing hlue knhuah hđăp đuĕ nao hlăm klei pla mjing hlue knhuah mrâo, kdrăp mrâo, mâo hdră êlan mă bruă hlăm klei bi hgŭm kjăp mơ̆ng phung duh mkra hŏng mnuih pla mjing. Mơ̆ng anăn dưi mghaih msir bruă knuă mă kơ lu mnuih hlăm alŭ wăl.”

Lê Quang Hùng, Khua knơ̆ng bruă mdrao mgŭn Gia Lai brei thâo, hdră mtrŭn mrô 72 mơ̆ng phŭn bruă kđi čar lehanăn klei hdră mă bruă mrô 06 mơ̆ng bruă Đảng čar Gia Lai kơ klei mđĭ kyar bruă mdrao mgŭn wưng thŭn 2026-2030 bi klă bruă pla mjing ana êa drao, jing sa mta bruă čuăn tal êlâo. Kyuanăn, ngă bruă pla mjing ana êa drao ti Vĩnh Thạnh djŏ guôp hŏng hdră êlan mđĭ kyar ti Gia Lai lehanăn hdră êlan mơ̆ng kluôm ala.

Ana Đan Sâm jing sa mta ana êa drao yuôm, lehanăn ba wĭt lu klei tŭ dưn kơ klei suaih pral. Ară anei dlông rŏng lăn, mâo leh lu ala čar ba yua mdrao dŭm mta klei ruă kboh, kơ phung mniê ba tian kkiêng anak. Anei jing bruă tal êlâo mâo mkŏ mjing ti Việt Nam pla ana Đan Sâm hŏng ênhă prŏng. Kyuadah mơ̆ng mnuih ƀuôn sang Vĩnh Thạnh ăt srăng dưi dưn mơ̆ng hdră êlan anei”.

Hlue ngă bruă pla mjing lehanăn mkra mjing ana êa drao Đan Sâm ti ƀuôn hgŭm Vĩnh Thạnh, čar Gia Lai ssrăng dưn yua tŭ jing klei găl ana êa drao hlăm alŭ wăl. Mơ̆ng anăn, mjing boh kdrŭt mđĭ kyar bruă duh mkra, mghaih msir bruă knuă mă, ƀrư̆ ƀrư̆ mjing hdră êlan mđĭ kyar kluôm hŏng klei kjăp klei tŭ dưn ana êa drao pioh kơ mta kñăm mđĭ kyar bruă mdrao mgŭn, lehanăn bruă pla mjing hŏng hdră mrâo mrang ti Gia Lai.