Yap truh kơ akŏ mlan 6/2026, bruă mkra sang hră knŭk kna čiêm rông mlir gưl 1 lehanăn gưl 2 ti 7 boh ƀuôn hgŭm nah yŭ čar Gia Lai mâo bi leh truh kơ mkrah bruă knuă 50%. Siămdah, hlăm jih 7 boh sang hră ară anei ăt jing êmưt mkă hŏng hdră kčah klei mă bruă mơ̆ng 15 - 52 hrue.

Êpul kiă kriê bruă rŭ mdơ̆ng čar Gia Lai mtă, mơ̆ng ară anei truh jih hrue  30/8, dŭm êpul êya trŭn ngă bruă hŏng klei mjêč, tio nao jih mnuih, ksiêm dlăng bi kjăp ya mta bruă adôk ka leh, lŏ tio nao mnuih mă bruă, kdrăp mă bruă, lehanăn mă bruă hrue lehanăn mlam, kñăm čiang bi leh bruă djŏ hŏng wưng kčah. Dŭm êpul êya bruă kăp kčĕ, kăp ksiêm nanao klei dôk mă bruă, ksiêm kơ hnơ̆ng kjăp, klei êđăp ênang êjai mă bruă, amâo mâo djŏ ôh kyua tiŏ êran čiăng bi leh, ngă hĕ klei amâo mâo kjăp. Phạm Xuân Điệp, Khua anôk bruă kiă kriê dŭm bruă rŭ mdơ̆ng čar Gia Lai brei thâo:

"Mâo 2 bruă yuôm bhăn hĭn jing mghaih msir klei dleh dlan, gun kpăk mơ̆ng phung dôk ngă bruă, čiăng kơ pô kiă kriê bruă knuă dưi ngă bruă hŏng klei jăk găl. Tal dua, jing êpul bruă srăng bi hgŭm hŏng dŭm alŭ wăl, êpul êya lehanăn phung rŭ mkra dưn yua jih ai dưi tiŏ nao thiăm mnuih mă bruă đru phung rŭ mkra."

 Ti anôk mtrŭt mjhar bruă knuă, pô duh bi liê, êpul êya mă bruă, êpul kăp ksiêm dlăng mâo leh klei ƀuăn rơ̆ng  bi leh hrue mă bruă, rŭ mdơ̆ng bi mâo hnơ̆ng kjăp, lehanăn mă bruă hlăm klei êđăp ênang, gĭr bi leh bruă knuă djŏ hŏng klei kiă kriê mơ̆ng phŭn bruă kđi čar, mơ̆ng knŭk kna lehanăn knơ̆ng bruă sang čư̆ êa čar Gia Lai. Trần Bảo, K'iăng khua knơ̆ng bruă duh bi liê rŭ mdơ̆ng Dacinco, jing êpul êya pô rŭ mkra sang hră knŭk kna čiêm rông mlir gưl 1 lehanăn 2 Ia Dom hưn kơ hdră êpul êya pô mă bruă:

“Hŏng adiê msĕ si ară anei, hjan nanao mơ̆ng 2-3 blư̆/hrue. Hmei mâo mtam mơ̆ng 5 - 6 srăng mă bruă. Tal êlâo, jing lŏ tiŏ nao mnuih mă bruă, ară anei grăp anôk dôk rŭ mdơ̆ng, hmei mâo truh 320 čô mnuih dôk mă bruă. Tal dua, hmei srăng mâo hdră lŏ mđĭ gưl mă bruă, mđĭ êpul mă bruă, mơ̆ng 2 - 3 gưl/ sa mlam. Dah adiê hjan, srăng lŏ mâo hdră hnô mmông mă bruă. Mbĭt anăn hyuă kjăp klei kăp ksiêm čiăng kơ bruă knuă rŭ mkra dưi jing kjăp.”

Bruă rŭ mdơ̆ng sang hră knŭk kna čiêm rông mlir gưl 1 lehanăn 2 ti čar  Gia Lai mâo ênoh duh bi liê jih jang êbeh 1.516 êklai prăk, mâo rŭ mdơ̆ng leh ti  7 boh ƀuôn hgŭm ti knông lăn mâo Ia Mơ, Ia Púch, Ia Pnôn, Ia Nan, Ia Dom, Ia Chía lehanăn Ia O. Tơdah leh ruĕ bruă rŭ mdơ̆ng, sang hră srăng dưi djăp kơ  êbeh 7.000 čô hđeh hriăm hră tui hriăm, hŏng jih jang dŭm boh adŭ hriăm, anôk hđeh đih đăm, alŭ wăl kơ phung nai dôk, lehanăn dŭm bruă mkăn. Klei rŭ mdơ̆ng anei jing yuôm bhăn, kñăm čiăng mđĭ hnơ̆ng mjuăt bi hriăm hlăm krĭng knông lăn čar Gia Lai.