Knơ̆ng bruă sang čư̆ êa čar Dak Lak mrâo bi hgŭm hŏng Anôk bruă kahan ksiêm kriê dlăng bruă ngă hră mơar kơ klei êđăp ênang ala ƀuôn (Phŭn bruă Kahan ksiêm), Kahan ksiêng čar leh anăn Knơ̆nh bruă GeneViet mkŏ mjing hdră bruă mă mta ADN mơ̆ng găp djuê kahan djiê êngiă ka thâo hlei pô. nei amâo djŏ knŏng jing bruă ngă hdơr knga ƀri wưng hruê 27/7 ƀiădah lŏ jing knhuang pŏk ngă klă klơ̆ng "Hdră 500 hruê mlam mtrŭt mđĭ bruă tui duah, bi kƀĭn lehanăn bi mklă anăn klang lĭng kahan djiê êngiă" dôk pŏk hluê ngă hlăm kluôm ala.

Hlue si klei ksiêm yap, kluôm čar Dak Lak ară anei mâo 15.222 boh msat lĭng kahan djiê êngiă, hlăm anăn, dŭm anôk bruă djŏ tuôm ksiêm dlăng, hrui mă klei hâo hưn mơ̆ng 10.235 čô djiê êka; mrâo mâo 5.911 čô dưi bi klă anăn, adôk 4.324 čô kahan djiê êngiă ka dưi bi mklă anăn. Năng mđing hĭn, mâo 2.706 čô lĭng kahan dôk hlăm găp djuê mâo djăp klei găl dưi tŭ mă mta ADN, hŏng ênoh jih jang 3.860 čô.Gưl pŏk ngă anei mdưm mta kñăm hrui mă êbeh 70% ênoh mta mâo djăp klei găl čiăng mkŏ mjing klei čih pioh ADN ala čar, mkăp kơ bruă bi mkă, bi mklă anăn klang lĭng kahan djiê êngiă hlăm wưng ti anăp.

Čiăng kơ bruă hrui mă mta hluê ngă hrăm mbĭt, djŏ hdră kčah leh anăn rơ̆ng kơ klei djŏ klă, Kahan ksiêm čar Dak Lak dăp leh 12 anôk hrui mă hlăm kluôm čar, iêu mtrŭt êpul êya mơ̆ng gưl čar truh kơ gưl să klă anăp ktrâo lač, đru kơ mnuih ƀuôn sang bi leh hră mơar, bi mklă klei hâo hưn leh anăn mă mta sinh phẩm Đại tá Võ Hùng Tường, Khua adŭ bruă kahan ksiêm kriê dlăng hră mơar kơ klei êđăp ênang ala ƀuôn, Kahan ksiêm čar Dak Lak brei thâo:

Hmei bi mguôp kjăp hŏng dŭm êpul ngă bruă mơ̆ng anôk bruă kiă kriê klei ngă hră mơar, dăp mnuih ngă bruă hlăm 12 anôk mă mta lehanăn mđrăm mbĭt mkŏ mjing hrui mă mơ̆ng hrue 23 truh hrue 26/7/2026. Grăp êpul mâo sơăi êpul ngă bruă mkăp kơ hdră hrui mă ăt msĕ mơh bi mklă djŏ klei hâo hưn mơ̆ng găp djuê čiăng rơ̆ng kơ bruă hrui mă mta djŏ klă".

Mâo ƀô̆ mta ti anôk mă mta ti ƀuôn hgŭm Ea Kao, amai H’Blak Niê ba mbĭt hŏng klei hmăng hmưi mơ̆ng jih gŏ sang. Amiêt ñu jing kahan djiê êngiă ƀiădah lu thŭn êgao amâo dưi bi mklă ôh kđông kahan, anôk săn asei amâodah msat. Hŏng gŏ sang ñu, bruă mă mta ADN amâo djŏ knŏng jing klei ngă hră mơar ƀiădah jing klei găl čiăng lŏ čuê sa klei khăp leh tloh hĕ kyua klei bi blah.

"Đảng leh anăn Knŭk kna mă mta ADN čiăng duah găp djuê phung djiê êngiă, gŏ sang hơ̆k mơak êdi, kuč mngač klei čang hmăng čiăng kơ hmei dưi duah amiêt pô".

Klei mdê mơ̆ng hdră tal anei amâo djŏ knŏng dôk ti kdrăp mrâo mrang ƀiădah lŏ dôk ti boh tŭ yuôm jăk siam. Grăp mta ADN dưi kriê pioh hruê anei năng ai ka brei boh tŭ mtam ôh, ƀiădah srăng jing sa boh kdrŭt yuôm bhăn hlăm klei čih pioh ala čar, mprăp bi mkă tơdah mâo thiăm klei hưn kơ klang kleh lĭng kahan djiê êngiă dưi bi kƀĭn. Anăn ăt jing hdră čiăng kơ klei kreh knhâo mđrăm mbĭt hŏng klei bhiăn "Mnăm êa hdơr kơ hnoh", đru kơ hdră hdơr knga amâo mdei hlăm dŭm knăm bi hdơr ƀiădah lŏ dơ̆ng hŏng dŭm bruă ngă klă sĭt. Kyuadah leh êgao mkrah ênuk hnŭk êngiê, klei lu gŏ sang hmăng hmưi hĭn ăt jing sa hruê găp djuê pô dưi iêo djŏ anăn, dưi wĭt hŏng ƀuôn sang pô, leh anăn grăp mta ADN dưi tŭ mă jing thiăm sa klei hmăng mhưi čiăng kơ dŭm klei bi tuôm leh klei bi blah hnưm dưi jing klei sĭt.