Grăp aguah, kahan hđăp Hán Vinh Hà, ti alŭ Sơ Trà, să Krông Ana, čar Dak Lak lŏ mâo ƀô̆ mta ti anôk mkrăm boh mnŭ mơ̆ng hnưm snăk. Leh ksiêm dlăng grăp knưng boh, ñu mdiăng mô̆ nao sang mnia leh anăn kơh nao čuă lŏ. Hlăm bruă mưng juăt hlăm lu thŭn đru leh kơ ñu mâo anôk dôk jăk siam. 5 ha mdiê, 3 ha ana boh kroh mbĭt hŏng anôk mkra mjing mnơ̆ng lŏ hma leh anăn sa anôk rông bip, ba wĭt kơ pô kahan hđăp prăk hrui wĭt dŭm êklai prăk hlăm grăp thŭn.Hán Vinh Hà lŏ yăl dliê, čiăng truh kơ hruê anei, ñu găn leh lu klei amâo mâo jăk kyua yan adiê ngă leh anăn klei ruă tưp. Klei anăn đru kơ ñu amâo kdŭn ôh, hluê si ñu, jing klei bhiăn leh anăn ai tiê mjuăt bi hriăm hlăm lĭng kahan.

“Boh kdrŭt jing pô amâo tŭ klei dleh dlan, amâo tŭ klei ư̆ êpa, brei kpưn đĭ. Pô dưi hriăm mơ̆ng hlăk dôk hlăm lĭng kahan jing klei bhiăn, klei gĭr ktưn mơ̆ng pô čiăng kơ pô ngă êjai, duh myơr êjai kơ gŏ sang, kơ yang ƀuôn"

Ăt msĕ hŏng kahan hđăp Hán Vinh Hà, lu ƀĭng hgŭm kahan êka êkeh ti Krông Ana ăt ba ai tiê lĭng kahan hlăm klei hdĭp aguah tlam. Pô rŭ mdơ̆ng đang war, pô pŏk anôk duh ƀơ̆ng. Tơdah klei hdĭp mda hơĭt leh, diñu lŏ dơ̆ng đru ƀĭng kahan leh anăn mnuih ƀuôn sang gĭr ktưn.

Kahan hđăp Hoàng Văn Cư, ti ƀuôn Trấp, ară anei dưi mkŏ mjing anôk bruă mnia blei kdrăp yua bruă lŏ hma leh anăn hrui blei mnơ̆ng dhơ̆ng lŏ hma hơĭt kjăp. Leh bruă duh mkra gŏ sang đĭ kyar, ñu lŏ hrăm mbĭt hŏng mnuih ƀuôn sang leh anăn phung hlăm êpul kahan hđăp dleh dlan. Grăp thŭn, dua boh sang čhĭ mnia ñu đru kơ lu mnuih ƀuôn sang blei hbâo pruê, amâo mâo tĭng prăk mnga ôh. Ñu kreh đru kơ mnuih mâo klei hdĭp dleh dlan, nao čuă êmuh, mđĭ ai ƀĭng hgŭm kahan hđăp ruă duam, mduôn khua. Kahan êka êkeh Lê Đắc Đạm, ti ƀuôn Trấp, să Krông Ana yăl dliê kơ bruă mă Hoàng Văn Cư:

“Ti ƀuôn adôk lu lĭng kahan hđăp ăt dôk hlăm klei dleh dlan êdi, kƀah prăk blei hbâo pruê snăn mâo awa Cư đru brei hŏng ênoh êlưih, amâo mâo mnga ôh. Hlăm dŭm bruă ngă, msĕ si hlăm grăp thŭn jing lĭng kahn mkŏ mjing hruê knhuah gru mơ̆ng êpul hgŭm, dŭm bruă mjuăt ktang asei mlei jing ñu đru jih.”

Tui si Hoàng Văn Cư, dŭm thŭn mlan hlăm lĭng kahan amâo mâo djŏ knŏng bi hriăm ai tiê duh ƀơ̆ng đuč ôh, ƀiădah lŏ mtă kơ grăp čô kahan brei hdĭp mâo bruă klam hŏng yang ƀuôn, wăt tơdah klei bi blah đuĕ kbưi leh.

“Êjai mŭt hlăm bruă lĭng kahan, hmei mâo klei mjuăt hriăm kơ knhuah dôk dơ̆ng ƀơ̆ng huă, leh anăn kơ klei thâo mă bruă knuă. Hlăm klei bi blah amâodah ênuk êđăp ênang msĕ mơh, phung kahan brei mâo klei thâo bi hmô jăk, čiăng kơ anak čô tui hlue. Nao hgŭm hlăm êpul kahan hđăp snăn brei mđĭ ai ayŏng adei rơ̆ng klei suaih pral, gĭr hdĭp mda leh anăn hrăm mbĭt đru mguôp kơ alŭ wăl.”

Êpul hgŭm kahan hđăp să Krông Ana ară anei mâo giăm 1 êbâo čô ƀĭng hgŭm, mơ̆ng thŭn 2025 amâo lŏ mâo ôh mnuih hgŭm hlăm gŏ êsei ƀun, giăm sa kdrêč hlăm tlâo hlăm phung hgŭm mâo klei hdĭp mda jăk. Đỗ Xuân Đản, Khua êpul hgŭm bruă kahan hđăp să Krông Ana lač snei, boh tŭ anăn dưi mâo mơ̆ng bruă ba klei hriăm lehanăn hluê ngă msĕ si Awa hlăm dŭm hdră bruă klă sĭt msĕ si bi đru hdơ̆ng găp mđĭ kyar bruă duh mkra, bi hrŏ ƀun, mkŏ mkra krĭng ƀuôn sang mrâo leh anăn dlăng kriê phung hlăm êpul.

Dŭm hdră bruă amâo djŏ knŏng đru mguôp bi lar ai tiê Asăp mtrŭn 05 mơ̆ng Phŭn bruă kđi čar ƀiădah lŏ bi êdah bruă klam mơ̆ng lĭng kahan hđăp hlăm ênuk êđăp ênang, bi lar rup jăk siam kơ kahan ‘Lĭng kahan Awa Hô’, đru bi mlih krĭng ƀuôn sang.

“Phung knuă druh, ƀĭng hgŭm kahan hđăp să Krông Ana gĭr msir mghaih klei dleh dlan čiăng kpưn đĭ hlăm klei hdĭp, êjai kbiă mơ̆ng kahan ăt djă pioh leh anăn mđĭ lar jăk knhuah gru lĭng kahan awa Hồ, jing gru mngač êdah êdi hlăm dŭm hdră mkŏ mkra krĭng ƀuôn sang mrâo msĕ si myơr lăn, mkra êlan, mtrŭt mjhar mnuih knap mñai, thâo bi đru, gĭr ktưn mđĭ dŭm bruă ti alŭ wăl kpưn đĭ".

Klei bi blah đuĕ kbưi leh, dŭm kdrăn lŏ leh anăn kđông kahan hruê anei bi hrô leh kơ klei hing ang thŭn hđăp. Knhuah gru mơ̆ng phung lĭng kahan hlăk đưm ăt mlih mdê, ƀiădah klei mĭn găn klei dleh dlan, ai tiê đua klam leh anăn klei thâo bi mguôp ăt dôk snăn. Anăn ăt jing hdră phung kahan hđăp ti Krông Ana lŏ dơ̆ng hriăm leh anăn hlue ngă knhuah mngač Awa Hồ hŏng bruă ngă grăp hruê.