Pô mă bruă Đoàn Văn Tâm, mnuih mrâo wĭt mơ̆ng ƀuôn prŏng Hồ Chí Minh wĭt kơ ƀuôn sang čiăng mă bruă ti wăl anôk bruă tuh tia Becamex Bình Định (čar Gia Lai) brei thâo čang hmăng dưi wĭt ti ƀuôn pô čiăng ngă bruă lehanăn bi hơĭt klei hdĭp leh sa wưng sui đuê̆ mơ̆ng ƀuôn sang duah klei găl čô kơ bruă.

 “Êlâo dih, kâo nao ti hlăm ƀuôn hgŭm Bình Tân, Sài Gòn (Ƀuôn prŏng Hồ Chí Minh) ngă bruă mâo giăm 10 thŭn. Hnơ̆ng prăk mlan, prăk mưn hlăm anăn sa mlan hlăm brô 13 êklăk, ƀiădah ară anei wĭt tinei dôk leh anăn mă bruă giăm sang. Prăk mlan leh anăn prăk hrui wĭt mđĭ mmông ƀơ̆ng rơ̆ng leh snăn lŏ mâo 8 êklăk prăk hlăm grăp mlan. Prăk ƀiă pô yua ƀiă ăt jăk hĭn mă bruă ti Sài Gòn.”

Leh bi mŭt mbĭt, dŭm čar ti Lăn Dap Kngư mâo thiăm klei găl mđĭ kyar, iêô jak lu hdră bruă kơ wăl tuh tia mkra mjing, hiu čhưn ênguê, kdrŭn ksĭ leh anăn ƀuôn prŏng hŏng ênoh bi liê êbeh 470.000 êklai prăk, wưng thŭn 2026 - 2030. Knŏng čar Dak Lak mâo hlăm brô 170.000 êklai prăk. Huỳnh Lữ Tân, Khua hlăm êpul kiă kriê bruă Đảng čar Daklak, Khua anôk bruă kiă kriê klei duh mkra Phú Yên brei thâo, dŭm mta bruă mrâo čiăng truh 60.000 čô mnuih mă bruă, jing klei găl kơ bruă knuă mă–hrui wĭt kơ mnuih ƀuôn sang, ƀiădah ăt jing klei lông dlăng wăt kơ ênoh leh anăn hnơ̆ng jăk mnuih mă bruă:

"Hŏng hnơ̆ng kluôm ênoh duh bi liê lu êdi mơ̆ng anôk bruă nah gŭ dŭm wăl tuh tia mkra mjing, hdră bruă hiu čhưn ênguê lehanăn dŭm hdră bruă mkăn hlăm wăl anôk mkra mjing hlăm dŭm anôk duh mkra, kâo mĭn srăng iêo jak sa ênoh lu mnuih hriê mă bruă. Knŏng Êpul hgŭm Hoà Phát lehanăn dŭm hdră bruă mkăn mơ̆ng ară anei truh thŭn 2030 dưi msir mghaih hlăm brô 40.000 čô mnuih mă bruă kơ krĭng nah Ngŏ čar Dak Lak".

Nguyễn Quang Thuân, K’iăng khua knơ̆ng bruă kiă kriê bruă knuă čar Daklak bi mklă, ăt msĕ hŏng dŭm čar ti lăn dap kngư mâo klei mdê hjăn kơ bruă duh mkra pla mjing tui hlue hŏng yan, hnơ̆ng prŏng bruă tuh tia mkra mjing adôk êmưt; klei dưi hriăm mjuăt, mđĭ kyar, leh anăn dŭm mta bruă yang ƀuôn adôk mâo lu klei kƀah. Daklak tuôm hŏng klei amâo mâo jăk hlăm bruă iêo jak leh anăn krơ̆ng jơ̆ng mnuih mă bruă, Nguyễn Quang Thuân tŭ ư, tơdah amâo dưi mâo ôh hdră êlan mtrŭn djŏ guôp, mnuih ngă bruă srăng lŏ jing anôk kpăk đĭ kyar mơ̆ng alŭ wăl:

“Ară anei, dŭm anôk bruă duh mkra jưh jơ̆ng ti alŭ wăl čar Dak Lak tla kơ mnuih mă bruă jing ƀiă êdi mkă hŏng dŭm krĭng mkăn, kyuadah drei jing krĭng 3, krĭng 4. Đa đa mnuih nao hriăm bruă ti ƀuôn prŏng Hồ Chí Minh amâodah Đồng Nai diñu dưi tla mơ̆ng 8.5 êklăk prăk/mlan amâodah kdlưn hĭn, ƀiădah leh wĭt ti Dak Lak diñu knŏng dưi tla mâo mă 6 êklăk/mlan đuč. Leh kơ anăn, wăl anôk mă bruă ăt kăn dưi msĕ hŏng dŭm anôk bruă duh mkra prŏng mơh, snăn anei ăt mâo mơh dŭm klei êdu kƀah, snăn phung duh mkra ti Daklak brei mđĭ mlih mrâo čiăng iêo jak, krơ̆ng jơ̆ng mnuih mă bruă.”

Mă bruă hŏng dhar bruă kiă kriê bruă knuă kơ mnuih mă bruă kơ wưng mđĭ kyar mrâo, Khua gĭt gai Đảng, Khua lăn čar Tô Lâm mñă klă: Bruă rơ̆ng kơ hnơ̆ng tŭ jăk mnuih mă bruă nao mbĭt hŏng bruă mđĭ hnơ̆gn hdĭp kơ phung mă bruă; Mđĭ kyar ai dưi mnuih amâo djŏ knŏng hdră êlan mă bruă ƀiădah lŏ mguôp hŏng hdră djuê ana, mđĭ kyar anak mnuih leh anăn bi kjăp klei đăo knang mơ̆ng mnuih ƀuôn sang.

Khădah amâo lač ôh kơ boh klei mdê hjăn mơ̆ng dŭm čar Lăn Dap Kngư ƀiădah hdră êlan gĭt gai mơ̆ng Khua gĭt gai Đảng, Khua lăn čar ti knăm anei, lač djŏ leh tur knơ̆ng mơ̆ng Lăn dap Kngư hlăm hdră mđĭ kyar ai dưi mơ̆ng mnuih mă bruă, anăn jing “Mđĭ kyar mguôp hŏng hdră duh ƀơ̆ng klă sĭt mơ̆ng grăp krĭng, grăp djuê ana, grăp êpul êya”; Mdrơ̆ng hŏng bruă kriê pioh knhuah dhar kreh, răng mgang wăl hdĭp mda, răng mgang dliê, răng mgang lăn, krơ̆ng phŭn mkăp êa yua, răng mgang knông lăn. Khua gĭt gai Đảng, Khua Lăn čar Tô Lâm tă hdră klă klơ̆ng kơ bruă klam mơ̆ng Knŭk kna leh anăn dŭm bruă klam săng ngă.

“Knŭk kna đru kơ anôk bruă brei čan prăk, klei hâo hưn, mjuăt bi hriăm hdră bhiăn, knơ̆ng bruă, êpul hgŭm bruă, anôk mkra mjing, bi hgŭm hrui blei ktrâo lač kơ hdră mnêč, mkŏ mjing anăn knăl, hnơ̆ng čuăn tŭ jăk, alŭ wăl mkŏ mjing bi mguôp ngă bruă êđăp ênang, bi hrŏ klei đuê hriê dôk hjăn, mă bruă amâo mâo hơĭt, arăng mčhua, arăng mplư. Mđĭ kyar bruă mă ti krĭng mnuih ƀuôn sang djuê ana ƀiă mguôp hŏng bruă kriê pioh knhuah dhar kreh, răng mgang wăl hdĭp mda, răng mgang dliê, răng mgang lăn, răng mgang hnoh êa, krơ̆ng knông lăn mta kñăm amâo djŏ knŏng mâo thiăm bruă mă ƀiădah brei mâo bruă mă djŏ guôp hŏng klei găl mâo, dhar kreh, klei mưng, bruă duh mkra, đru kơ mnuih ƀuôn sang bi hơĭt klei hdĭp, bi hrŏ ƀun hŏng klei kjăp, čŏng pô ñŭ kma, đru mguôp hlăm klei mđĭ kyar mbĭt mơ̆ng lăn čar.”

Boh sĭt mơ̆ng pưk hma truh kơ dŭm anôk ngă bruă, dŭm hdră bruă prŏng ti dŭm čar Lăn Dap Kngư, truh kơ klei gĭt gai, ktrâo lač mơ̆ng khua gĭt gai Đảng leh anăn knŭk kna brei ƀuh, mtô mjuăt mnuih mă bruă jing mkăp kơ klei čiăng êlâo hĭn, leh anăn mprăp ai dưi hlăm wưng sui. Mnuih mă bruă djăp kơ ênoh, kjăp kơ hnơ̆ng tŭ jăk srăng jing boh kdrŭt yuôm bhăn čiăng kơ dŭm hdră bruă mđĭ lar klei tŭ dưn, bi sĭt mta kñăm đĭ kyar 2 ênoh mrô, mbĭt anăn ăt jing tur knơ̆ng čiăng mkŏ mjing sa Lăn Dap Kngư mtah, jiă kma knhuah gru, sa krĭng nah tluôn kjăp mơ̆ng Lăn čar.

Leh anăn čiăng dưi mâo klei anăn, dŭm čar ti Lăn Dap Kngư amâo djŏ knŏng čiăng hluê ngă dŭm hdră êlan đru kơ anôk bruă nah gŭ, brei čan prăk, hâo hưn, mtô mjuăt msĕ si Khua gĭt gai Đảng, Khua lăn čar bi êdah leh, ƀiădah lŏ brei ktang phĭt hlăm bruă mgaih msir dŭm klei amâo jăk hlăm klei đĭ kyar msĕ ară anei; rơ̆ng kơ bruă mă- hnư hrui wĭt leh anăn klei hdĭp hơĭt kjăp kơ mnuih mă bruă.