H’Ních Niê djuê ana Êđê ti ƀuôn hgŭm Tân An leh dưi ksiêm mkă dlăng klei suaih pral amâo mă prăk hlăm gưl tal êlâo mâo Knơ̆ng bruă sang čư̆ êa čar Dak Lak mkŏ mjing, brei thâo:

 “Gưl tal êlâo kâo dưi ksiêm mkă dlăng klei ruă msĕ si ară anei, leh ksiêm dlăng thâo klă klei suaih pral pô. Kâo pô lehanăn mnuih ƀuôn sang hlăm ƀuôn mơak mơh. Čang hmăng mơ̆ng ară anei kơ anăp mâo Đảng, Knŭk kna mđing dlăng lu hĭn čiăng kơ mnuih ƀuôn sang lŏ dưi ksiêm mkă dlăng klei ruă amâo mâo mă prăk”.

Hluê si Châu Thị Kim Phụng, Khua Anôk bruă mdrao mgŭn ƀuôn hgŭm Tân An, hlăm 2 hruê kăm mkŏ mjing hdră ksiêm mkă dlăng klei suaih pral kơ mnuih ƀuôn sang, bi mklă klei hâo hưn hlăm hră mơar suaih pral điện tử lehanăn Hră ênua mdrao mgŭn hlăm kdrăp VneID, alŭ wăl bi leh 100% hnơ̆ng čuăn kčah lehanăn lŏ dơ̆ng pŏk mlar hdr ksiêm mkă dlăng klei suaih pral amâo mâo mă prăk kơ jih jang mnuih ƀuôn sang.

“Anôk bruă mdrao mgŭn mkŏ mjing hdră ksiêm mkă dlăng klei ruă hlăm lam asei mlei, kŏ dlô, êgei mbah, ală – ƀăng adŭng – kŏng đŏk, knga, tĭng bi mklă klei suaih pral kơ mnuih ƀuôn sang. Mbĭt anăn, lŏ mâo hdră ksiêm dlăng êrah, êa tlô, ăt msĕ mơh pŏk hdră mă rup X-quang. Mbĭt hŏng hdră ksiêm mkă dlăng, anôk bruă mdrao mgŭn ăt đru kơ mnuih ƀuôn sang bi mklă klei hâo hưn hlăm hră mơar klei suaih pral điện tử.”

Aê mdrao thơ̆ng adŭ mdrao II Phạm Minh Hữu, Kơiăng khua knơ̆ng bruă mdrao mgŭn čar Dak Lak brei thâo, hluê ngă klei gĭt gai mơ̆ng Knơ̆ng bruă sang čư̆ êa čar lehanăn Hdră mtrŭn mrô 72 mơ̆ng Phŭn bruă kđi čar kơ hdră ksiêm mkă dlăng klei suaih pral grăp gưl, amâo mă prăk kơ mnuih ƀuôn sang, Knơ̆ng bruă pŏk ngă leh hdră kčah truh kơ dŭm anôk bruă mdrao mgŭn hlăm 102 să, ƀuôn hgŭm kluôm čar; bi hgŭm hŏng Anôk bruă mdrao mgŭn knŭk kna, êngao knŭk kna mprăp maĭ mŏk, kdrăp mnơ̆ng lehanăn mnuih mă bruă mkăp kơ mnuih ƀuôn sang. Hlăm anăn, ngă tal êlâo ti 4 să, ƀuôn hgŭm mâo Tân An, Tuy Hòa, dŭm să Đồng Xuân lehanăn Krông Bông; 98 să, ƀuôn hgŭm adôk srăng pŏk ngă mơ̆ng hruê 1/7 kơ anăp. Truh kơ ară anei, giăm 500 čô mnuih ƀuôn sang dưi ksiêm mkă dlăng ênŭm hluê si klei ktrâo lač mơ̆ng Phŭn bruă mdrao mgŭn, hdră ksiêm mkă dôk hluê ngă hŏng dŭm êbâo čô. Aê mdrao Phạm Minh Hữu mñă klei yuôm bhăn mơ̆ng bruă ksiêm mkă dlăng klei suaih pral kơ jih jang mnuih buôn sang.

 “Ksiêm mkă dlăng klei suaih pral mnuih ƀuôn sang dưi kah mbha jing 3 êpul, mơ̆ng 0 – 6 thŭn, mơ̆ng 6 – 18 thŭn, adôk mơ̆ng 18 thŭn kơ dlông. Bruă čŏng ksiêm mkă dlăng klei suaih pral srăng dưi bi mklă nik klei suaih pral mơ̆ng mnuih ƀuôn sang dôk ti ya hnơ̆ng, jăk amâo dah hơaĭ, leh kơnăn tơdah ƀuh mâo klei ruă srăng mtă mtăn kơ mnuih ƀuôn sang brei nao dŏng mdrao djŏ guôp”.

Čar Dak Lak leh mkŏ dăp mâo 3,34 êklăk čô mnuih. Hluê ngă Hdră mtrŭn mrô 72 mơ̆ng Phŭn bruă kđi čar, wưng thŭn 2026 – 2030, Dak Lak tĭng mkăp 1.000 êklai prăk/thŭn čiăng ksiêm mkă dlăng amâo mă prăk kơ mnuih ƀuôn sang. KNŏng hlăm thŭn 2026, čar mkăp 400 êklai prăk kơ 102 anôk bruă mdrao mgŭn să, ƀuôn hgŭm, hŏng ênoh bi liê hlăm brô 350 êbâo prăk./čô/gưl mkă dlăng klei ruă. Lương Nguyễn Minh Triết, Khua bruă Đảng čar Dak Lak mñă, hŏng alŭ wăl prŏng, mnuih ƀuôn sang dôk amâo bi knar ti dŭm alŭ wăl, ênoh gŏ êsei ƀun lehanăn mnuih djuê ƀiă lu, hdră ksiêm mkă dlăng klei suaih pral kơ mnuih ƀuôn sang jing bruă klam yuôm bhăn, rơ̆ng amâo lui hlei pô dôk ti tluôn. Khua bruă Đảng čar Dak Lak mtă kơ dŭm knơ̆ng, dhar bruă, alŭ wăl hluê ngă hŏng ai tiê đua klam.

 “Dŭm anôk bruă mdrao mgŭn brei nao grăp alŭ, grăp sang čiăng rơ̆ng grăp čô mnuih dưi nao ksiêm mkă dlăng klei ruă amâo mă prăk grăp gưl, boh nik hŏng mnuih knŭk kna dlăng ba, mnuih khua thŭn, mnuih amâo jăk ssei mlei, gŏ sang ƀun lehanăn mnuih ƀuôn sang djuê ƀiă. Anôk bruă mdrao mgŭn čar brei mđing djăp klei găl mâo, kdrăp mnơ̆ng, mkŏ mjing hdră ksiêm mkă dlăng kreh knhâo, knhăk, rơ̆ng boh tŭ dưn.

Bruă ksiêm mkă dlăng klei suaih pral amâo mă prăk kơ mnuih ƀuôn sang amâo djŏ knŏng hnưm hmao ƀuh, pral dŏng mdrao klei ruă, hdră lŏ đru bi mưng jing klei bhiăn hlăm hdră čŏng dlăng kriê klei suaih pral hlăm êpul êy. Hŏng klei hgŭm mơ̆ng anôk bruă kđi čar, mta kñăm jih jang mnuih dưi kriê dlăngklei suaih pral, dưn hdră mdrao ênuk mrâo dôk jing klei sĭt, ba Hdră mtrŭn mrô 72 mơ̆ng Phŭn bruă kđi čar hnưm mŭt hlăm klei hdĭp ti krĭng čư̆ dliê prŏng liă lia./.