Hdră anei mâo êpul hgŭm bruă gưl dlông êdam êra Việt Nam lehanăn êpul hgŭm gưl dlông phung duh mkra mda asei Việt Nam mkŏ mjing hŏng akŏ “Klei mbruă mơ̆ng lam – mđĭ hnơ̆ng thâo duh mkra mnuih Việt Nam”. Mơ̆ng dŭm êtuh hră mơar mâo hrŏng ruah hlăm kluôm ala, Êpul gơ̆ng mâo hrŏng ruah lehanăn mpŭ mni kơ 86 phung duh mkra mda asei kdlưn hĭn, hlăm anăn mâo  10 čô jing mnuih dôk hlăm ênoh TOP 10.

Blŭ hrăm hlăm knăm anei, k’iăng khua knŭk kna Nguyễn Văn Thắng bi mni kơ dŭm klei đru mguôp yuôm bhăn mơ̆ng phung duh mkra mda asei, lŏ mñă klei mđĭ kyar bruă knuă mrâo bi nao mđrĭng hŏng klei kreh knhâo, kdrăp mrâo, mlih mrâo hŏng klei mbruă, lehanăn klei bi mlih mrô. K’iăng khua knŭk kna mtă lŏ dơ̆ng kơrŭ ai tiê khăp kơ klei rŭ mjing bruă knuă, lehanăn mâo ai tiê thâo duh myơr hlăm phung êdam êra Việt Nam.