Ti anôk rŭ mdơ̆ng anôk dôk mrâo prŏng 5 ha ti ƀuôn hgŭm Hồng Sơn, čar Lâm Đồng dŭm pluh čô mnuih mă bruă mbĭt hŏng lu kdrăp mnơ̆ng dôk mkra dŭm ktuê êlan găn êrô hlăm alŭ wăl. Đặng Hữu Linh, Khua knơ̆ng kiă kriê hdră bruă brei thâo, anôk bruă mkra mđĭ pral, truh ară anei bi leh giăm 50% hnơ̆ng bruă mă.

“Ti anôk dôk rŭ mdơ̆ng mđĭ lar êbeh 25 čô mnuih mă bruă, wăt pô mgăt êdeh. Ară anei ayŏng adei dôk kƀĭn mđĭ pral hnơ̆ng čiăng rơ̆ng kơ hdră kčah jing bi leh hdră bruă hlăm mlan 9/2026”.

Ti anôk rŭ mdơ̆ng anôk dôk mrâo ti să Lương Sơn, čar Lâm Đồng, phung mă bruă hŏng lu kdrăp mnơ̆ng ăt dôk ngă bruă nanao. Wăl anôk dôk mrâo ti să Lương Sơn mâo rŭ mdơ̆ng hlăm ênhă êbeh 4 ha, leh bi leh srăng mâo anôk dôk kơ êbeh 100 gŏ êsei. Tinei lŏ mâo anôk bruă mnia blei. Phạm Huy Hoàng, Khua gĭt gai anôk rŭ mdơ̆ng brei thâo, hŏng hnơ̆ng ară anei, anôk bruă mĭn tĭng bi leh bruă rŭ mdơ̆ng hlăm krah mlan 8 kơ anăp.

“Grăp hruê ti anôk rŭ mdơ̆ng dưm 8 êpul rŭ mdơ̆ng, sa êpul mơ̆ng 10-12 čô mnuih mă bruă. Bruă rơ̆ng êđăp ênang mnuih mă bruă, anôk mă bruă ngă djŏ hlue si hră mtrŭn mơ̆ng čar. Sitôhmô, klei pui srăng dăp êđăp ênang, amâo brei lĕ mtŭk mtŭl. Ti dŭm anôk dlưh, hroh snăn kă klei hưn brei răng, mdhă hưn brei răng êđăp ênang hlăm anôk rŭ mdơ̆ng čiăng rơ̆ng klei găn êrô kơ mnuih ƀuôn sang leh anăn ayŏng adei rŭ mdơ̆ng.”

Čiăng duh kơ hdră bruă êlan êdeh treng êran pral, čar Lâm Đồng ruh mgaih anôk ala hŏng ênhă êbeh 1.000 ha. Čar mjêč pŏk ngă ruŭ mdơ̆ng 8 wăl anôk dôk mrâo kơ giăm 1000 gŏ êsei hmăi djŏ  kyua hdră bruă. Đặng Tuấn Anh, Anôk bruă kriê dlăng hdră bi liê rŭ mdơ̆ng mrô 2 čar Lâm Đồng, brei thâo, ară anei jih jang anôk ala mâ ba jao kơ dŭm anôk bruă rŭ mdơ̆ng 8 hdră bruă. Mbĭt anăn dŭm klei gun kpăk hlăm hdră rŭ mdơ̆ng ăt dưi ruh mgaih čiăng mđĭ pral hnơ̆ng:

“Dŭm anôk mă boh tâo ti alŭ wăl čar Bình Thuận hđăp, boh nik jing krĭng kwar Dhŭng mâo lu anôk mă leh jih wưng kčah mơ̆ng hră mơar snăn amâo dưi mkăp ôh. Khua anôk duh bi liê bi hgŭm leh hŏng Knơ̆ng bruă lŏ hma wăl hdĭp mda leh anăn dŭm anôk bruă djŏ tuôm čiăng duah hdră msir mgaih klei dleh dlan. Ară anei, dŭm boh phŭn gun kpăk anei dưi msir mgaih leh, phung rŭ mdơ̆ng dôk mđĭ hnơ̆ng čiăng lŏ mbŏ kơ wưng êmưt êlâo anăn”.