Êbeh 1 thŭn êgao, ayŏng Ja Si Môn, khua dlăng bruă ƀuon Ha Wai, să Đơn Dương, čar Lâm Đồng mă nanao dŭm bruă mbĭt. Êlâo kơ bi mŭt čar, lui gưl kdriêk leh anăn bi mŭt să, mnuih ƀuôn sang Churu ti kdriêk Đơn Dương hđăp ăt mâo lu klei mĭn čiăng. Thâo klă hdră êlan mơ̆ng Đảng, hdră ngă bruă mơ̆ng Knŭk kna leh anăn Bruă sang čư̆ êa alŭ wăl, hŏng kơhưm pô, ayŏng Ja Si Môn nao truh grăp boh sang hlăk mblang, đru kơ mnuih ƀuôn sang thâo săng klă, mkŏ mjing klei sa ai. Êlâo kơ wưng bi hdơr bŏ sa thŭn ngă gru hmô Bruă sang čư̆ êa alŭ wăl 2 gưl, khua dlăng bruă nah gŭ Ja Si Môn lŏ bi lar bruă klam pô hlăm bruă hâo hưn, mtrŭt mjhar mnuih ƀuôn sang hluê ngă hdră êlan mkŏ dăp, bi mŭt 3 ƀuôn Ha Wai, Ma Đanh  leh anăn Thôn Mới hŏng jih jang êbeh 1000 gŏ sang:

“Klei bi mŭt mbĭt hlăm wưng mă klei blŭ mguôp mơ̆ng mnuih ƀuôn sang, ƀuh mnuih ƀuôn sang sa ai êdi. Diñu nao hgŭm jih ai tiê, sa ai hŏng dŭm hdră êlan mơ̆ng Knŭk kna hlăm wưng kơ anăp alŭ ƀuôn srăng đĭ kyar hĭn”.

Să Đơn Dương, čar Lâm Đồng dưi mkŏ mjing mơ̆ng wăl krah Thạnh Mỹ, să Dă Ròn leh anăn să Tu Tra mơ̆ng kdriêk Đơn Dương hđăp. Să mâo 33 alŭ, ƀuôn truh leh 17 alŭ ƀuôn ti gŭ 300 gŏ sang. Hluê ngă hdră bi khuăt, mđĭ boh tŭ dưn klei ngă bruă ti nah gŭ, să Đơn Dương wĭt mkŏ dăp, mkŏ mjing 15 alŭ ƀuôn mrâo leh anăn djă pioh 1 ƀuôn, bi hrŏ 17 ƀuôn mkă hŏng êlâo dih. Nguyễn Văn Vinh, Khua dhar bruă mặt trận să Đơn Dương brei thâo, hlăm klei mkŏ dăp wĭt alŭ ƀuôn čiăng găl hlăm klei kiă kriê, gĭt gai, 12 čô khua mduôn, phung mâo kơhưm hlăm să jinig mta phŭn yuôm bhăn đru mkŏ mjing klei sa ai hlăm yang ƀuôn, bi kjăp klei đăp knang mơ̆ng êpul êya mnuih djuê ƀiă hŏng Đảng, Knŭk kna:

“Hmei lač klă phung mâo kơhưm ti alŭ wăl să Đơn Dương jing kdrông mkŏ plah wah mnuih ƀuôn sang hŏng Đảng leh anăn Knŭk kna. Diñu jing phung hmei đăo knang, mâo klei blŭ ba hdră êlan, klei bhiăn lăn čar mơ̆ng Đảng leh anăn Knŭk kna truh hŏng mnuih ƀuôn sang, boh nik jing krĭng mnuih djuê ƀiă. Diñu jing gru mngač čiăng kơ mnuih ƀuôn sang hluê ngă”.

Čar Lâm Đồng ară anei mâo 49 djuê ana hdĭp mda, hlăm anăn mnuih djuê ƀiă mâo 17%. Kluôm čar mâo 883 čô mâo kơhưm mâo mnuih ƀuôn sang đăo knang, mpŭ leh anăn jing anôk knang kjăp kơ êpul êya. Hlăm wưng êgao bruă klam mơ̆ng phung mduôn ƀuôn, phung mâo kơhưm ti Lâm Đồng ƀrư̆ hruê ƀrư̆ bi klă diñu jing hla čhiăm gru ba anăn hlăm bruă mkŏ wĭt anôk bruă Knŭk kna, ba yua klei kreh knhâo hlă klei mkra mjing, bruă lŏ hma, djă pioh hdră bhiăn, knhuah gru djuê ana, răng mgang klei êđăp ênang nah gŭ, mkŏ mjing klei bi mguôp jih jang djuê ana. Ayŏng Ban Niêng Ha Dang, mnuih djuê ana K’Ho, ƀuôn hgŭm Lang Biang - Đà Lạt brei thâo, kyua mâo phung mduôn khua mtô kơ mnuih ƀuôn sang thâo mđĭ kyar klei hdĭp mda gŏ sang, ƀuôn sang ƀrư̆ hruê ƀrư̆ đĭ kyar, êđăp ênang:

“Hŏng klei êđăp ênang ti alŭ wăl, bruă klam mơ̆ng phung khua mduôn jing yuôm sơnăk. Khua mduôn tinei jing phung mâo kơhưm mtô kơ phung hđeh, leh anăn ƀuôn sang răng mgang klei êđăp ênang, boh nik jing gang mkhư̆ klei amâo mâo jăk hlăm yang ƀuôn, klei mtiŏ êdeh, mnăm kpiê, duah tlĕ dăp. Khua mduôn jing kdrông mkŏ plah wah êpul răng mgang klei êđăp ênang ƀuôn hgŭm hrăm mbĭt djă pioh, răng mgang klei êđăp ênang ti nah gŭ”.

Hdĭp ti krah êpul êya, thâo săng klei čiăng, klei hmăng hmưi mơ̆ng grăp čô mnuih ƀuôn sang, phung khua mduôn, phung mâo kơhưm ti čar Lâm Đồng jing kdrông mkŏ kjăp pklah wah klei mĭn Đảng hŏng ai tiê mnuih ƀuôn sang. Čil Bri, k’iăng khua knơ̆ng bruă klei đăo leh anăn djuê ana čar Lâm Đồng brei thâo, mđing hmư̆ klei blŭ mguôp mơ̆ng phung khua mduôn, phung mâo kơhưm, anôk bruă đru kčĕ hŏng čar hluê ngă hdră mđĭ kyar bruă duh mkra ala ƀuôn, djă pioh leh anăn bi lar knhuah gru dhar kreh djŏ hŏng boh sĭt leh anăn tŭ dưn. Ăt mơ̆ng anăn dŭm klei blŭ mguôp mơ̆ng phung khua mduôn, phung mâo kơhưm čar Lâm Đồng lŏ dơ̆ng mđing ai dưi duh bi liê kơ krĭng taih kbưi, krĭng mnuih djuê ƀiă čiăng mđĭ hnơ̆ng klei hdĭp mnuih ƀuôn sang, bi hrŏ klei kpleh đĭ kyar:

“Mnuih djuê ƀiă leh anăn krĭng čư̆ čhiăng hluê hdră jing bi kƀĭn mâo mta phŭn, mă mnuih ƀuôn sang jing mta kñăm mđĭ hnơ̆ng jăk klei hdĭp jing giê mkă. Dŭm ai dưi msir dŭm boh klei čiăng êdi kơ bruă mkŏ mkra, sang hră mơar, bruă mdrao mgŭn, hdră duh ƀơ̆ng leh anăn mđĭ kyar mnuih mă bruă. Yuôm bhăn hĭn jing mkŏ mjing klei găl kơ mnuih djuê ƀiă bi lar ai ktang mơ̆ng lam, nao hgŭm lăm klei đĭ kyar mbĭt mơ̆ng čar”.

Ti krah dŭm klei mlih mơ̆ng ƀuôn sang Lâm Đồng ară anei, khua mduôn, phung mâo kơhưm ăt jing kmeh hdĭp hlăm ƀuôn sang, jing anôk knang mơ̆ng mnuih ƀuôn sang dŭm djuê ana. Hŏng  kơhưm, klei thâo leh anăn bruă klam hŏng yang ƀuôn, diñu jing kdrông mkŏ klei mĭn Đảng hŏng ai tiê mnuih ƀuôn sang đru ba hdră êlan mơ̆ng Đảng, Knŭk kna nao hlăm klei hdĭp, ksul mbŭ klei bi mguôp jih jang djuê ana, djă pioh knhuah dhar kreh leh anăn mkŏ mjing ƀuôn sang đĭ kyar./.