Ti alŭ Vĩnh Tường, să Phước Dinh, čar Khánh Hoà, lu gŏ sang dôk mprăp mbĕ đuĕ čiăng ba jao anôk ala čiăng rŭ mdơ̆ng sang măi pui hạt nhân Ninh Thuận 1. Klei mnuih ƀuôn sang uêñ mĭn hĭn mmông anei jing ênoh prăk čiu tla, đru leh anăn dăp anôk dôk mrâo. Nguyễn Văn Trong, sa čô mnuih ƀuôn sang ti să Phước Dinh brei thâo, hlăm mlan 3 mrâo êgao, Bruă kƀĭn ala ba dah leh hdră êlan čiăng ruh mgaih dŭm klei kpăk kơ bruă čiu tla, ruh mgaih anôk ala, msir dŭm klei akâo êlâo anăn, phung bi ala hơ̆k mơak êdi

“Knŭk kna tla prăk tŭ dưn kơ mnuih ƀuôn sang, mnuih ƀuôn sang hơ̆k mơak êdi. Knŭk kna čiu tla, đru kơ mnuih ƀuôn sang jăk hĭn čiăng kơ ênoh nao dôk đĭ anôk mrâo đĭ hĭn, amâo lŏ ƀun ƀin ôh.”

Mbĭt hŏng hdră duh ƀơ̆ng leh anăn anôk dôk mrâo, bruă mbĕ đuĕ, klei msat aduôn aê atâo tiêt jing klei mnuih ƀuôn sang dôk uêñ mĭn. Hŏng diñu, anei amâo djŏ knŏng mđuĕ msat, ƀiădah lŏ djŏ tuôm hŏng klei đăo, hdră bhiăn leh anăn klei mpŭ kơ phung djiê. Kyuanăn, mnuih ƀuôn sang hmăng hmưi srăng mâo mmông mprăp, găl guôp hŏng alŭ wăl. Nguyễn Thanh Hiệp, mnuih ƀuôn sang krĭng ngă hdră, să Phước Dinh mñă:

“Gŏ sang mâo 6 boh msat mbĕ đuĕ, kâo ngă djŏ nanao hdră êlan mơ̆ng Đảng leh anăn knŭk kna jao anôk ala rŭ mdơ̆ng sang măi pui kmlă hạt nhân Ninh Thuận 1. Mmông thanh minh anei ăt dơ̆ng tuč leh kâo ăt mñă kơ să pral mă hră, čiăng kơ mnuih ƀuôn sang mprăp klă nik”.

Knhal jih mlan 3 êlao, dhar Bruă kƀĭn ala  ba mdah hdră mtrŭn bi mbŏ, mkra mlih đa đa hdră êlan hlăm klei duh bi liê rŭ mdơ̆ng sang măi pui kmlă hạt nhân Ninh Thuận. Hluê anăn bi kluôm hdră bhiăn čiu tla, đru leh anăn dăp anôk dôk mrâo, mbĭt anăn rơ̆ng kơ boh tŭ dưn mnuih ƀuôn sang hlăm krĭng hdră. Hluê si klei čuăn mrâo, dŭm gŏ sang djăp klei găl srăng dưi jao lăn anôk dôk mrâo leh anăn lui 100% prăk yua lăn. Bi hŏng ênhă lăn lŏ hma amâo mâo djŏ lŏ bi mlih leh mta kñăm yua lăn ƀiădah ka leh hră mơar, knŭk kna ăt ksiêm dlăng bruă čiu tla hluê si klei yua lăn

Nguyễn Văn Quế, Khua Bruă sang čư̆ êa să  Vĩnh Hải brei thâo, kyua hdră êlan mrâo, bruă čiu tla, ruh mgaih anôk ala mơ̆ng sang măi pui kmă hạt nhân Ninh Thuận 2 dôk dưi mtrŭt bi pral.

“Jih jang bruă tĭng mă, bi klă pô lăn ară anei dưi ngă leh jih, hmei gĭt gai gưl bruă nah gŭ yua ênoh hlue si hdră mtrŭn 121 mrâo hĭn.Mđĭ phung mâo klei găl jing 487 gŏ sang.”

Hluê si Nguyễn Văn Nhựt, Khua knơ̆ng bruă tuh tia car Khánh Hoà, jih jang ênhă hrui wĭt lăn čiăng rŭ mdơ̆ng sang măi pui kmlă hạt nhân Ninh Thuận 1 leh anăn Ninh Thuận 2 jing 760ha, hŏng giăm 1.400 gŏ sang mbĕ đuĕ. Bruă kƀĭn ala  ba mdah hdră mtrŭn mrô 121 ruuh mgaih leh lu klei kpăk hlăm klei čiu tla, đru leh anăn dăp anôk dôk.  Kyuanăn, bruă ruh mgaih anôk ala ti dŭm alŭ wăl dôk ngă pral, mkŏ mjing klei sa ai hlăm mnuih ƀuôn sang. Ară anei čar Khánh Hoà dôk ngă hŏng ai tiê mjêč, gĭr bi leh jih jang bruă ruh mgai anôk ala êlâo kơ jih mlan 6 thŭn anei čiăng ba jao kơ pô duh bi liê ngă hdră.

“Hdră mtrŭn anei ruh mgaih lu sơnăk, boh nik jing klei akâo mơ̆ng čar Khánh Hòa, lŏ dơ̆ng bi klă hĭn leh anăn giăm hĭn hŏng boh sĭt hlăm klei čiu tla. Kyuanăn, ngă klei čiu tla, ruh mgaih anôk ala pral hĭn, mâo klei sa ai mơ̆ng mnuih ƀuôn sang. Ară anei čar dôk kñăm ktang phĭt, mjêč leh anăn yua ênoh hluê si hdră čiu tla kơ mnuih ƀuôn sang hlăm wưng pral hĭn”.