Bruă Đảng čar Khánh Hòa mrâo mkŏ mjing klei bi kƀĭn bi trông plah wah Anôk dlăng bruă Đảng čar hŏng knuă druh, phung mă bruă knŭk kna gưl să thŭn 2026. Klei bi kƀĭn tŭ mă 210 klei blŭ mguôp mơ̆ng phung knuă druh, phung mă bruă knŭk kna ti 64 să, ƀuôn hgŭm. Dŭm klei blŭ akâo kƀĭn hlăm dŭm bruă dăp êpul bruă, dăp knuă druh, klei bhiăn hdră êlan, mkra mlih hră mơar, bi mlih mrô leh anăn prăk bi liê ngă bruă nah gŭ.

Lu alŭ wăl lač kơ boh klei êgao hnơ̆ng tơdah ênoh phung knuă druh, phung mă bruă knŭk kna ka djŏ guôp hŏng hnơ̆ng ênoh mnuih ƀuôn sang leh anăn klei čiăng bruă klam. Lu ƀuôn hgŭm lu mnuih ƀuôn sang, alŭ wăl prŏng, hnơ̆ng bi mlih ƀuôn prŏng pral ƀiădah klei čuăn mnuih mă bruă ka dưi dăp năng guôp, ngă kơ knuă druh ngă lu kdrêč bruă.

Trương Thị Thu Thảo, K’iăng Khua Anôk bruă mkŏ mjing Đảng ƀuôn hgŭm Nam Nha Trang, čar Khánh Hòa brei thâo, hnơ̆ng bruă knuă đĭ pral, ƀiădah prăk hrui wĭt lu knuă druh hrŏ.

Alŭ wăl mâo lu phung mă bruă mdei mă bruă leh anăn bi mlih anôk mă bruă, klei kpĭ kơ bruă mă prŏng hĭn hlăk êjai anăn ară anei amâo lŏ mâo mkăp 30% êpul Đảng. Leh wưng pioh êjai 6 mlan ară anei pră mlan hrŏ lu, klei kpĭ kơ bruă knuă kyua anăn lu phung mă bruă bi mlih bruă ngă čiăng djŏ guôp hŏng klei găl, klei hdĭp gŏ sang”.

Ară anei, Khánh Hòa mâo 4 ƀuôn hgŭm mâo ênoh mnuih ƀuôn sang êbeh 100.000 čô leh anăn êbeh 10 să, ƀuôn hgŭm mâo ênoh mnuih ƀuôn sang êbeh 50 êbâo čô. Lu alŭ wăl akâo kơ čar mđing mbŏ phung mă bruă kơ dŭm alŭ wăl mâo lu mnuih ƀuôn sang; mbĭt anăn hnưm pŏk ngă anôk bruă mă leh anăn mkŏ mjing hrŏng ruah čiăng bi hrŏ kơ gưl să. Phạm Ngọc Hải, Khua dlăng bruă Đảng să Tây Khánh Sơn brei thâo, hlăk êjai bruă lu, mnuih ƀiă, alŭ wăl čiăng snăk ba yua kdrăp mrâo hâo hưn čiăng mđĭ boh tŭ msir bruă mă. Khădah snăn, klei dleh dlan prŏng ară anei jing kƀah prăk bi liê:

Tơdah knuă druh, phung mă bruă hmei dưi ba yua hdră bruă anei săn klă sĭt snăk, srăng dưi mkiêt mkriêm hruê mmông, tŭ dưn kơ klei kčĕ hĭn, hnơ̆ng jăk duh kơ mnuih ƀuôn sang leh anăn anôk bruă duh mkra srăng jăk hĭn. Yuôm bhăn jing  prăk bi liê čiăng blei kdrăp mâo klei dưi yua, akâo kơ Knơ̆ng bruă sang čư̆ êa čar mkăp prăk bi liê čiăng kơ alŭ wăl blei yua amâodah akâo kơ čar blei, leh anăn mbha klei dưi ba yua kơ knuă druh mơ̆ng gưl čar truh gưl să čiăng hmei ba yua.”

Leh mđing hmư̆ klei blŭ ti anôk bi kƀĭn, Trần Phong, Khua dlăng bruă Đảng čar Khánh Hòa mtă kơ dŭm knơ̆ng, dhar bruă mjêč ruh mgaih klei dleh dlan hlăm klei dưi ksiêm dlăng, mbĭt anăn ksiêm dlăng klei akâo êgao klei dưi čiăng hưn mdah hŏng gưl dlông ksiêm dlăng msir mgaih.

“Mtă kơ dŭm anôk bruă, knơ̆ng, dhar bruă mđĭ klei bi hgŭm, pral hĭn, mbha knuă druh ksiêm dlăng grăp alŭ wăl, păn kjăp boh klei, klei gun kpăk, hmao đru kčĕ kơ Bruă đảng čar, Knơ̆ng bruă sang čư̆ êa čar. Jih jang dŭm pluh klei wĭt lač anei brei lŏ ksiêm dlăng, mơĭt kơ 64 să, ƀuôn hgŭm, brei mâo boh tŭ wĭt lač, dưi amâodah hơăi? Dôk guôn hlei pô?”

 Mjưh ruê̆ klei bi kƀĭn trông, lu bruă mơ̆ng boh sĭt ngă bruă ti nah gŭ ti Khánh Hòa dưi kčah hŏng klei klă mngač, mơ̆ng klei kpĭ êgao hnơ̆ng mă bruă, kƀah mnuih mă bruă, bi hrŏ prăk hrui wĭt truh kơ klei dleh dlan kơ prăk bi liê mlih mrô. Dŭm klei akâo mơ̆ng phung knuă druh, phung mă bruă knŭk kna ti 64 să, ƀuôn hgŭm amâo djŏ knŏng lač kơ klei mĭn phung knuă druh nah gŭ ôh ƀiădah lŏ brei ƀuh klei čiăng mjêč brei bi leh klei bhiăn, hdră êlan djŏ guôp hŏng boh sĭt ênoh mnuih ƀuôn sang, hnơ̆ng bi mlih jing ƀuôn prŏng leh anăn hnơ̆ng bruă mă ară anei. Bruă čar mtă brei ksiêm dlăng, wĭt lač klă klơ̆ng djăp klei akâo ăt dưi čang hmăng srăng đru ruh mgaih klei dleh dlan, mjing klei găl kơ phung knuă druh nah gŭ hơĭt ai tiê mă bruă, mđĭ klei tŭ dưn ngă bruă kơ mnuih ƀuôn sang leh anăn anôk bruă duh mkra ti alŭ wăl Khánh Hòa.