Blŭ hrăm pŏk klei kƀĭn tal 4 mơ̆ng Dhar Bruă Kbĭn ala aguah mbruê 8/7, ti sang Bruă Kbĭn ala, Khua Bruă Kbĭn ala Trần Thanh Mẫn mñă ktang, tơdah amâo mâo rơ̆ng kơ hnơ̆ng jăk, klei ngă bruă hluê si hdră kčah, Phung Khua phŭn bruă, khua gĭt gai anôk bruă gĭt gai klei čuh mkra leh anăn anôk bruă kiă kriê klei ksiêm dlăng srăng đua klam ti anăp Knŭk kna, Khua Knŭk kna leh anăn ti anăp dhar Bruă Kbĭn ala.

Khua Bruă Kbĭn ala Trần Thanh Mẫn mñă hŏng dŭm boh klei prŏng adôk mâo klei blŭ mdê mdê, amâodah mâo hdră êlan mrâo hŏng klei čuăn hdră bhiăn ară anei, anôk bruă čiăng čŏng pô bi mguôp hŏng dŭm anôk bruă mơ̆ng Bruă Kbĭn ala hmao hưn mdah hŏng gưl bruă mâo klei dưi ksiêm dlăng, bi klă, amâo mâo lui bruă bi kbĭn bruă knuă hlăm wưng knhal tuč mơ̆ng grăp gưl kƀĭn, Khua Bruă Kbĭn ala Trần Thanh Mẫn lŏ sa blư̆ mñă ktang, Hdră bhiăn srăng nao mbĭt hŏng hdră mtrŭn, asăp mtrŭn kơh dŭm hdră êlan mơ̆ng Bruă Kbĭn ala hlăm grăp gưl kƀĭn mâo boh tŭ dưn leh anăn hnưm nao hlăm klei hdĭp. Anei ăt jing klei mâo mnuih ƀuôn sang leh anăn knơ̆ng bruă dôk čang guôn.