Lŏ dơ̆ng dŭm bruă hlăm hdră nao čuă gưl Knŭk kna truh ti Philippines, tlam mbruê 31/5, hluê mmông alŭ wăl, Khua gĭt gai Đảng, Khua Lăn čar Tô Lâm mbĭt hŏng mô̆ ñu leh anăn êpul bi ala gưl dlông ala čar drei leh nao hgŭm leh anăn gĭt gai mmông bi tuôm hŏng dŭm êpul êya, knơ̆ng bruă leh anăn phung thơ̆ng kơ bruă mnuih Việt Nam ti Philippines. Blŭ hrăm hŏng phung bi ala, Khua gĭt gai Đảng, Khua Lăn čar Tô Lâm bi mni dŭm klei gĭr  mơ̆ng êpul êya mnuih Việt Nam ti Philippines hlăm bruă ñŭ kma hlăm ala ƀuôn anôk pô dôk, djă pioh knhuah gru djuê ana, mâo dŭm mta bruă mtrŭt mđĭ bruă duh mkra mnia mblei plah wah dua ala čar.

Mñă ktang hlăm dŭm klei bi tuôm hŏng khua gĭt gai gưl dlông mơ̆ng Philippines, Khua gĭt gai Đảng, Khua Lăn čar Tô Lâm srăng lŏ dơ̆ng mñă hŏng Knŭk kna Philippines lŏ dơ̆ng uêñ mĭn đru kơ mnuih ƀuôn sang mâo anôk dôk kjăp, bi hơĭt klei hdĭp, ñu kma hlăm anôk pô dôk. Khua gĭt gai Đảng, Khua Lăn čar Tô Lâm mñă klă hdră êlan sa anăn mơ̆ng Đảng leh anăn Knŭk kna jing uêñ mĭn, kriê dlăng kơ êpul êya mnuih Việt Nam ti ala tač êngao, dlăng anei jing kdrêč amâodưi ktlah leh anăn jing sa ai dưi yuôm bhăn mơ̆ng êpul êya djuê ana Việt Nam. Leh anăn hlăm wưng kơ anăp, đa đa hdră êlan hŏng mnuih Việt Nam ti ala tač êngao srăng lŏ dơ̆ng mkra mlih čiăng mkŏ mjing klei găl kơ mnuih ƀuôn sang drei ti ala tač êngao mâo lu klei đru mguôp hĭn kơ lăn čar, ƀuôn sang.