Klei bi kƀĭn mkŏ hŏng giăm 35 êbâo anôk mkŏ hlăm kluôm ala. Nao leh anăn blŭ hrăm gĭt gai klei bi kƀĭn, Khua gĭt gai Đảng, Khua lăn čar Tô Lâm mñă klă, Hdră mtrŭn mrô 10 bi êdah klei bi mlih hlăm klei mĭn đĭ kyar, amâo lŏ jing knŏng pŏk ƀăng mă prăk bi liê ôh ƀiădah pral ruah leh anăn yua klei găl ala tač êngao čiăng mjing klei dưi bi ktưn ala čar. Leh lač kơ klei kƀah hlăm bruă iêô jak FDI hlăm wưng êgao, Khua gĭt gai Đảng, Khua lăn čar Tô Lâm bi mklă, Hdră mtrŭn 10 kčah klei kñăm leh anăn klei čiăng lu hĭn, mđĭ kyar bruă duh mkra mâo prăk bi liê ala tač êngao brei bi mguôp hŏng mđĭ klei dưi bi ktưn kluôm, ai dưi mkra mjing, kdrăp mrâo leh anăn klei bi ktưn bruă duh mkra; gĭr truh thŭn 2030 Việt Nam hlăm êpul ba anăp ASEAN kơ wăl hdĭp mda bi liê mnia blei, ai bi ktưn, mlih mrâo mbruă, hnơ̆ng jăk kơ hdră bruă leh anăn klei dưi tŭ mă dŭm hdră bruă bi liê ala tač êngao hnơ̆ng jăk.

 Khua gĭt gai Đảng, Khua lăn čar Tô Lâm mñă klă, gĭr msir mgaih klei mtŭk mtŭl, hră mơar lu đei. Amâo brei phung bi liê găn lu boh ƀăng ngă bruă, luč lu hruê mmông leh anăn ênoh bi liê čiăng pŏk ngă sa hdră bruă djŏ hdră bhiăn. Hdră mtrŭn mrô 10 bi mklă 6 klei mĭn gĭt gai, 6 klei bi mlih prŏng kơ klei mĭn mđĭ kyar leh anăn kčah klei kñăm truh thŭn 2030 iêô jak 200-300 êklai USD prăk bi liê ala tač êngao. Hnơ̆ng trah dlăng truh thŭn 2045, Việt Nam jing anôk phŭn mkra mjing, hdră bruă, mlih mrâo leh anăn gĭt gai krĭng wăl mơ̆ng lu êpul grup lu ala čar.