Bri wưng bi hdơr 78 thŭn hruê khua gĭt gai Hồ Chí Minh iêo mthưr bi lông ktưn khăp kơ lăn čar 11/6, aguah mbruê, ti sang bruă Khua lăn čar, Khua gĭt gai Đảng, Khua Lăn čar Tô Lâm bi tuôm hŏng 100 čô bi ala êdah êdi mơ̆ng hdră “Bruă ngă jăk” mơ̆ng sang mđung rup Việt Nam mkŏ mjing. Phung bi ala hriê mơ̆ng lu krĭng kwar, ênuk thŭn, bruă mă mdê mdê, ƀiădah mâo mbĭt ai tiê hdĭp thâo khăp, bi kah mbha, bi đru êpul êya.

Bi ala khua gĭt gai Đảng, Knŭk kna, Khua gĭt gai Đảng, Khua Lăn čar Tô Lâm pah mni dŭm bruă ngă jăk siam, mñă klă anei jing dŭm boh tŭ dưn jăk siam đru bi lar knhuah gru thâo bi khăp mơ̆ng djuê ana. Mbĭt anăn mñă kơ dŭm phŭn, dhar bruă, alŭ wăl lŏ dơ̆ng mlih mrâo hdră bi lông ktưn khăp kơ lăn čar hŏng êlan klă klơ̆ng, tŭ dưn, nao mbĭt hŏng bruă klam mđĭ kyar lăn čar leh anăn đru kơ mnuih ƀuôn sang, mđĭ hnơ̆ng jăk bruă kriê dlăng klei hdĭp mnuih ƀuôn sang leh anăn hmao msir klei dleh dlan, kpăk gun ti nah gŭ.