Hlăm klei blŭ hrăm, Khua gĭt gai Đảng, Khua Lăn čar Tô Lâm mñă klă Việt Nam dlăng yuôm klei bi hgŭm leh anăn bi mguôp lu mta hŏng Switz, hmăng hmưi dua tĭng lŏ dơ̆ng bi mguôp kjăp, ngă tŭ dưn leh anăn mtrŭn agha êlam hĭn klei bi hgŭm hdră êlan kluôm dhuôm dưi mkŏ mjing hlăm mlan 1/2025.

Dua čô khua gĭt gai lač hlăm wưng tar rŏng lăn lŏ dơ̆ng bi mlih pral, dleh ksiêm dlăng, dua ala čar čiăng mđĭ klei blŭ hrăm, bi kjăp klei đăo knang kđi čar leh anăn bi mguôp hĭn hlăm lu mta bruă. Bi kơ klei bi mguôp hdră êlan lu tĭng, dua čô khua gĭt gai tŭ ư mđĭ hĭn klei bi mguôp hlăm dŭm klei kƀĭn prŏng leh anăn hdră Êpul hgŭm lu ala čar čiăng đru msir dŭm boh klei tar rŏng lăn hŏng klei mpŭ kơ hdră bhiăn, kyua klei êđăp ênang, hơĭt kjăp leh anăn mđĭ kyar mdrŏng ktang ti alŭ wăl ăt msĕ mơh tar rŏng lăn.