Khua gĭt gai Đảng, Khua lăn čar tĭng dlăng, leh sa thŭn hluê ngă Hdră mtrŭn 71, klei bi mlih klă hĭn jing kơ klei thâo săng, hdră bhiăn, hdră mtrŭn, ai dưi leh anăn hdră kriê dlăng; lu klei kpăk gun dôk mâo sui ƀrư̆ dưi mgaih msir. Hdră êlan hŏng phung nai mtô, phung hriăm dưi mđing dlăng hĭn; bruă mtô mjuăt bi hriăm bruă leh anăn mtô mjuăt bi hriăm gưl prŏng mâo klei bi mlih hluê hdră mguôp hŏng klei kreh knhâo, kdrăp mrâo, mlih mrâo mbruă leh anăn klei čiăng mnuih mă bruă.

Khă snăn, Khua gĭt gai Đảng, Khua lăn čar lač dŭm klei bi mlih kơ hnơ̆ng tŭ jăk bruă mtô mjuăt bi hriăm, phung nai mtô, phung hriăm leh anăn mnuih mă bruă ka klă sĭt ôh. Hruê mmông kơ anăp brei mlih ktang mơ̆ng bi leh klei bhiăn, hdră êlan nao kơ mkŏ mjing hluê ngă, mjing boh tŭ dưn klă klơ̆ng. Anôk bruă mtô bi hriăm brei mlih mrâo klă sĭt mơ̆ng bruă kriê dlăng sang hră, phung nai mtô truh kơ hdră mtô, hriăm, bi lông leh anăn ksiêm dlăng; bi hrŏ klei hriăm hdơr, hriăm djŏ guôp, mđĭ klei čŏng hriăm, hluê ngă, lông ngă, mĭn mrâo leh anăn klei thâo msir mgaih boh klei.