Hlăm knăm anei, Khua knŭk kna Lê Minh Hưng mđup brei leh klei pah mni yuôm bhăn mơ̆ng Đảng leh anăn Knŭk kna, čih yap klei đru mguôp mơ̆ng Êpul hgŭm leh anăn êpul êya anôk bruă duh mkra điêt leh anăn man dưn hlăm klei mkŏ mjing, mđĭ kyar lăn čar. Khua knŭk kna Lê Minh Hưng mtă kơ êpul êya duh mkra điêt leh anăn man dưn brei rông ba klei čang hmăng prŏng, grăp knhuang jing anôk bruă duh mkra prŏng, truh kơ krĭng wăl leh anăn dlông rŏng lăn.

Khua knŭk kna mñă klă bruă klam yuôm bhăn mơ̆ng krĭng wăl êngao knŭk kna, hlăm anăn bruă duh mkra điêt leh anăn man dưn jing êpul đru hlue ngă klei kñăm đĭ kyar dua ênoh mrô leh anăn dŭm hdră mđĭ kyar lăn čar truh thŭn 2030, hnơ̆ng trah dlăng 2045. Khua knŭk kna mtă brei lŏ dơ̆ng bi hrŏ, bi ênưih hră mơar, klei găl mnia blei leh anăn ênoh bi liê; bi leh hră čih Hdră bhiăn mđĭ kyar anôk bruă duh mkra điêt leh anăn man dưn. Knơ̆ng prăk knŭk kna brei gĭt gai dŭm êpul brei čan bi lu jơr mnơ̆ng dhơ̆ng, ba yua kdrăp mrâo, bi hrŏ wưng msir mgaih hră mơar čiăng kơ anôk bruă duh mkra ênưih čan prăk.