Nao hlăm knăm anei, Khua knŭk kna Lê Minh Hưng mpŭ leh anăn hdơr knga kơ phung mâo leh 80 thŭn, 75 thŭn leh anăn 70 thŭn dôk hlăm êpul bruă Đảng. Khua  knŭk kna bi mklă anei amâo djŏ knŏng jing gru kruăk knăl kơ hruê mmông ôh, ƀiădah jing hdră sui mơ̆ng klei hriăm mjuăt, duh myơr leh anăn ai tiê sĭt suôr hŏng Đảng, hŏng čar kwar, hŏng Yang ƀuôn. Khua knŭk kna lač, Hruê mkŏ mjing ala čar 2/9  jing hruê knăm prŏng djuê ana; anei jing gưl ktưn hưn lŏ dlăng kơ hdră êlan 81 thŭn hnŭk êngiê, hluh lir, mkŏ mjing, mđĭ kyar lăn čar leh anăn boh tŭ dưn prŏng kdrưh mơ̆ng cách mạng êbeh 96 thŭn ti gŭ klei gĭt gai mơ̆ng Đảng.

Hlăm hdră anăn kruăk knăl klei săn asei, duh myơr mơ̆ng lu ênuk gưl Việt Nam, boh nik phung đảng viên  khua thŭn – phung hnưm ƀuh klei mĭn krŭ kdơ̆ng, tui hlue Đảng mơ̆ng dŭm thŭn mlan lăn čar adôk lu klei dleh dlan. Khua knŭk kna čang hmăng phung đảng viên hŏng klei thâo, klei knhâo leh anăn kơhưm pô, lŏ dơ̆ng mđing uêñ, đru mguôp klei blŭ mkŏ mjing Đảng, mkŏ mjing bruă sang čư̆ êa; mtô bi hriăm, mtrŭt mjhar anak čô; lŏ mtô kơ ênuk mda sei klei khăp kơ ala čar, čŏng mĭn čŏng ngă, ai tiê đua klam hŏng êpul êya leh anăn klei čang hmăng mkŏ mkra ƀuôn sang, lăn čar mdrŏng sah.