Dŭm thŭn êgao, ti gŭ klei gĭt gai mơ̆ng Đảng, klei kiă kriê mơ̆ng Knŭk kna leh anăn hrăm mbĭt mơ̆ng yang ƀuôn, bruă bi hơĭt klei hdĭp dưi mâo lu boh tŭ dưn yuôm bhăn, truh kơ ară anei kluôm ala mâo êbeh 99 êklăk čô mnuih ƀuôn sang nao hgŭm hră ênua mdrao mgŭn, hlăm brô 2,5 êklăk čô dưi dưn klei đru leh wĭt mdei bruă, pŏk mlar klei răng mgang hŏng phung khua thŭn amâo mâo prăk mlan leh mdei bruă. Hdră bi hrŏ ƀun, ngăn prăk, sang dôk, sang hră mơar, bruă mdrao mgŭn, bruă mă leh anăn đru dŏng jing leh anôk knang mơ̆ng dŭm êklăk gŏ sang.

Khua gĭt gai Đảng, Khua Lăn čar Tô Lâm lač, bruă bi hơĭt klei hdĭp yang ƀuôn dưi mâo lu boh tŭ dưn yuôm bhăn. Ƀiădah, klei truh yan adiê ngă, klei ruă tưp leh anăn klei bi mlih mơ̆ng anôk mă bruă ăt ngă mâo lu klei kpĕ êka mrâo. Čiăng kơ mnuih ƀuôn sang dưi mâo klei răng mgang ti anăp dŭm klei truh tơl, Knŭk kna srăng mâo hdră êlan djŏ, srăng mâo ai dưi đăo knăl, bi mdrơ̆ng leh anăn hmao mâo klei đru. Khua gĭt gai Đảng, Khua Lăn čar Tô Lâm mñă brei mkŏ mjing ênoh mrô ala čar kơ bi hơĭt klei hdĭp yang ƀuôn, ba mdah hlăm grăp thŭn hluê alŭ wăl leh anăn êpul mnuih ƀuôn sang. Mta kñăm truh thŭn 2030 jing mkŏ mjing hdră bi hơĭt klei hdĭp yang ƀuôn lu gưl, kluôm dhuôm, mlih mrô, rơ̆ng klei hơĭt ƀiă êdi kơ grăp čô mnuih ƀuôn sang. Khua gĭt gai Đảng, Khua Lăn čar Tô Lâm mñă kơ Knŭk kna, Bruă Kbĭn ala, mặt trận čar kwar Việt Nam, gưl bruă Đảng nah gŭ, Bruă sang čư̆ êa alŭ wăl leh anăn kluôm yang ƀuôn hrăm mbĭt, gĭr čiăng kơ grăp čô mnuih ƀuôn sang Việt Nam, wăt ti anôk dôk leh anăn hlăm djăp boh klei, dưi mâo klei răng mgang ti anăp dŭm klei trul tơl, dưi mâo dŭm mta bruă čiăng êdi leh anăn mâo klei găl đĭ kyar.