Ti anăp mnguh mngăt Khua gĭt gai Hồ Chí Minh, Khua gĭt gai Đảng, Khua lăn čar Tô Lâm mbĭt hŏng phung bi ala myơr brui mngưi bi êdah klei hdơr knga prŏng prĭn kơ Khua gĭt gai Hồ Chí Minh, khua gĭt gai prŏng prĭn mơ̆ng mnuih ƀuôn sang Việt Nam; pô ngă bruă êdah kdlưn mơ̆ng hdră bruă cộng sản leh anăn mnuih mă bruă tar rŏng lăn. Pô duh myơr, săn asei jih klei hdĭp kơ bruă mtlaih êngiê djuê ana, kdơ̆ng mblah kơ klei êđăp ênang leh anăn jăk mơak mơ̆ng djuê ana Việt Nam leh anăn mnuih ƀuôn sang tar rŏng lăn.

Dŭm anôk knhuah gru, hră mơar, mnơ̆ng dhơ̆ng dôk rang mdah ti Wăl knhuah gru Khua gĭt gai Hồ Chí Minh ti Anôk bruă Khua lăn čar jing dŭm klei bi knăl hdĭp klă sĭt, bi êdah kơ klei hdĭp, bruă klam, klei mĭn, knhuah hdĭp leh anăn knhuah mă bruă mơ̆ng Awa Hồ. Ară anei, dŭm hră mơar, mnơ̆ng dhơ̆ng kơ Ñu tinei ăt dưi kriê pioh kjăp, đru kơ lu mnuih nao dlăng, ksiêm hriăm, tui hriăm kơ klei hdĭp, bruă klam, klei mĭn, knhuah hdĭp leh anăn knhuah mă bruă Hồ Chí Minh.