Hơêč hmưi kơ phung Khua bi ala tŭ mă bruă klam mrâo, Khua gĭt gai Đảng, Khua lăn čar mñă klă Việt Nam dlăng myuôm nanao klei bi mjĕ, bi hgŭm hŏng dŭm ala čar, čang hmăng hrăm mbĭt mtrŭt mđĭ klei mjĕ giăm dua tĭng ƀrư̆ hruê ƀrư̆ đĭ kyar klă sĭt, tŭ dưn hlăm dŭm mta bruă.

Hlăm dŭm klei tŭ drông, Khua gĭt gai Đảng, Khua lăn čar mtă kơ phung Khua bi ala ngă kdrông mkŏ mtrŭt mđĭ klei bi trông êpul, pŏk mlar klei bi hgŭm hlăm bruă duh mkra, mnia blei, duh bi liê, mtô bi hriăm, dhar kreh leh anăn mjĕ êrô mnuih ƀuôn sang; mbĭt anăn mđĭ klei bi hgŭm hlăm dŭm klei bi kƀĭn krĭng wăl leh anăn lu ala čar. Phung Khua bi ala bi êdah klei ktưn hưn mă bruă klam ti Việt Nam, mñă klă srăng gĭr ktưn ksŭl mbŭ klei bi mjĕ, bi hgŭm plah wah ala čar pô hŏng Việt Nam, đru ba klei mjĕ giăm dua tĭng đĭ kyar êlam hlăm wưng kơ anăp.