Khua gĭt gai Đảng, Khua lăn čar Tô Lâm bi mni kơ dŭm êpul grup prŏng mơ̆ng Thái Lan pŏk mlar bi liê, mnia blei ti Việt Nam, boh nik hlăm dŭm bruă djŏ guôp hŏng klei čiăng mđĭ kyar mơ̆ng Việt Nam leh anăn mâo klei dưi mjing thiăm ênoh yuôm kơ klei bi hgŭm dua nah. Khua gĭt gai Đảng, Khua lăn čar mñă, Việt Nam dlăng myuôm klei bi hgŭm hŏng Thái Lan, hlăm anăn mâo klei bi hgŭm bruă duh mkra, mnia blei, bi liê leh anăn mkŏ anôk bruă duh mkra jing kmeh gơ̆ng yuôm bhăn, đru mđĭ kyar kjăp leh anăn mđĭ klei mkŏ plah wah bruă duh mkra dua ala čar. Čih yap hdră bi liê, mnia blei mơ̆ng Êpul grup TCC ti Việt Nam hlăm dŭm thŭn êgao, Khua gĭt gai Đảng, Khua lăn čar akâo kơ Êpul grup lŏ dơ̆ng bi liê, mđĭ kyar bruă mnia blei ti Việt Nam hlue si hdră mđĭ klei thâo kriê dlăng, mđĭ ba yua klei kreh knhâo leh anăn kdrăp mrâo, mlih mrâo mbruă, răng mgang wăl hdĭp mda leh anăn đru mguôp jăk kơ êpul êya alŭ wăl.

 Ăt hlăm hdră nao čhưn ti Thái Lan, êlâo anăn, Khua gĭt gai Đảng, Khua lăn čar Tô Lâm myơr leh brui mngưi ti Wăl kriê pioh Khua gĭt gai Hồ Chí Minh leh anăn bi tuôm hŏng êpul êya mnuih Thái phŭn agha Việt hdĭp mda ti krĭng Ngŏ Dưr Thái Lan.