Aguah mbruê 1/7, gĭt gai klei kƀĭn trông ksiêm wĭt gru hmô Bruă sang čư̆ êa 3 gưl, Khua gĭt gai Đảng, Khua Lăn čar Tô Lâm mñă brei lŏ dơ̆ng bi kluôm klei kiă kriê, mtrŭt mđĭ klei mbha gưl, mbha klei dưi nao mbĭt hŏng ksiêm dlăng klei dưi, mkŏ mjing êpul knuă druh mâo djăp klei čuăn, rơ̆ng kơ phung mă bruă mrâo ngă bruă tŭ dưn, đru jăk hĭn kơ mnuih ƀuôn sang leh anăn knơ̆ng bruă.

Khua gĭt gai Đảng, Khua Lăn čar Tô Lâm mñă klă hdră êlan mkŏ dăp, bi khuăt phung mă bruă kđi čar jing găl guôp, čiăng êdi leh anăn mâo boh tŭ dưn hdră êlan hŏng klei đĭ kyar lăn čar.

Hlăm wưng kơ anăp, čiăng ksiêm dlăng bi kluôm hrăm mbĭt hdră bhiăn bhiăn čar, rơ̆ng kơ klei sa anăn, klă mngač, găl kơ bruă hluê ngă gru hmô bruă Knŭk kna 3 gưl. Gưl bruă Đảng nah gŭ gĭt gai hŏng hdră tă hdră êlan, hŏng klei kiă kriê, hŏng bruă knuă druh, hŏng klei ksiêm dlăng, ktuê dlăng leh anăn bi klă boh tŭ dưn. Čiăng rơ̆ng kơ klei gĭt gai mơ̆ng Đảng, ƀiădah amâo mâo ngă brei, amâo mâo phưi tha, amâo mâo čhuăk hlăm bruă Knŭk kna amâo mâo čiăng êdi hlăm bruă klam mơ̆ng dŭm anôk bruă Knŭk kna, mặt trận čar kwar leh anăn dŭm êpul bruă kđi čar - yang ƀuôn.