Hdră bruă kñăm ƀrư̆ ƀrư̆ krŭ wĭt wăl anôk phŭn mơ̆ng Hoàng thành Thăng Long, mbĭt anăn kriê pioh leh anăn mđĭ lar dŭm boh tŭ yuôm h ƀuê ênuk, dhar kreh mơ̆ng Knhuah gru dlông rŏng lăn. Điện Kính Thiên tuôm jing anôk phŭn mơ̆ng Cấm thành Thăng Long. Anei jing anôk phŭn kơ klei dưi leh anăn wăl anôk ngă yang hlăm sang prŏng, jing anôk mkŏ mjing klei kƀĭn, mkŏ mjing klei ngă yang prŏng leh anăn tŭ drông phung bi ala, jing klei bi êdah kdlưn hĭn kơ klei dưi lăn čar Đại Việt dăl dŭm ênuk gưl thŭn 15 - 18.

Hdră lŏ mkŏ mjing dưi mkŏ mjing hluê hŏng 15 thŭn ksiêm hriăm lu mta kơ h ƀuê ênuk, bruă ksiêm dlăng, bruă rŭ mdơ̆ng leh anăn mnơ̆ng kriê pioh amâo mâo êdah klă, mbĭt hŏng klei ksiêm êmuh mơ̆ng UNESCO leh anăn ICOMOS. Ƀuôn prŏng Hà Nội mtă kơ bruă kriê pioh, mkra mđĭ, lŏ mkŏ mjing brei hluê ngă hluê hŏng klei kreh knhâo, mpŭ êdi kơ dŭm mta phŭn leh anăn răng mgang kjăp dŭm gru kruăk hƀuê ênuk dưi ƀuh. Hdră dưi bi mklă jing knhuang mphŭn kčưm yuôm bhăn hlăm bruă hluê ngă hdră tă krŭ wĭt ktuê êlan phŭn Hoàng Thành Thăng Long truh thŭn 2035, đru ba dŭm boh tŭ yuôm knhuah gru truh giăm hĭn hŏng mnuih ƀuôn sang leh anăn phung tuê hiu čhưn ênguê.