Khua knŭk kna lač klă, mđĭ kyar sang brei mưn djŏ guôp hŏng klei dưi tla leh anăn sang dôk brei mưn jing sa hdră êlan prŏng mơ̆ng Đảng leh anăn Knŭk kna. Khua knŭk kna mtă bi mlih klei mĭn mơ̆ng mđĭ kyar sang brei mưn jing mđĭ kyar sang dôk mnia blei leh anăn sang brei mưn, hlăm anăn sang brei mưn dưi bi mklă jing hdră  phŭn, sui, duh kơ lu mnuih ƀuôn sang, boh nik phung mă mă, phung hriăm gưl prŏng, lĭng kahan...

Khua knŭk kna mtă kơ ƀuôn prŏng Hà Nội mđing ngă anôk êlâo, brei ba anăp, mjêč ktuê dlăng jih jang hnơ̆ng čuăn yua lăn, čuăl mkă ƀuôn prŏng leh anăn krĭng ƀuôn sang... čiăng mâo hdră mkŏ dăp, mđĭ kyar gru hmô sang brei mưn; gĭr ktưñ rŭ mdơ̆ng dŭm hdră bruă hlăm mlan 6 kơ anăp. Phŭn bruă rŭ mdơ̆ng pral kčĕ dŭm  hdră êlan mrâo, klei bhiăn kluôm mđĭ kyar sang brei mưn kơ dŭm alŭ wăl mđĭ kyar sang brei mưn leh anăn Phŭn bruă ksiêm dlăng. Mbĭt anăn, Phŭn bruă rŭ mdơ̆ng pral bi hgŭm hŏng dŭm alŭ wăl, êlâo hĭn jing Hà Nội, ƀuôn prŏng Hồ Chí Minh, Đồng Nai, Hải Phòng, Đà Nẵng mkra hla kak klei čiăng kơ sang mưn mjing tur knơ̆ng čuăl mkă leh anăn mbha klei găl, gĭt gai bi hgŭm hŏng dŭm phŭn, anôk bruă leh anăn alŭ wăl ksiêm dlăng kčĕ hnơ̆ng klă klơ̆ng mđĭ kyar sang dôk kluôm ala, hưn hŏng Khua knŭk kna hlăm mlan 7/2026.