Drông pô bi ala Canada, Khua knŭk kna mñă, Việt Nam dlăng Canada jing ƀĭng hgŭm yuôm bhăn lehanăn čang hmăng mđĭ kyar Klei bi mjĕ ƀĭng hgŭm phŭn kluôm dhuôm ƀrư̆ hruê ƀrư̆ hơĭt kjăp, mđing truh kơ bruă ba klei bi mjĕ truh ti hnơ̆ng mrâo. Khua knŭk kna mtă kơ Canada lŏ dơ̆ng pŏk ƀăng kơ mnơ̆ng dhơ̆ng Việt Nam, boh nik mnơ̆ng lŏ hma, dliê kmrơ̆ng lehanăn mnơ̆ng hlăm êa, mđĭ klei bi hgŭm mjuăt bi hriăm mnuih mâo klei thâo hlăm bruă tuh tia ba yua kdrăp mrâo. Dua tĭng lŏ dơ̆ng bi hgŭm kjăp, tŭ dưn, sa ai hŏng hdơ̆ng găp ti dŭm êpul, klei bi kƀĭn trông hlăm krĭng, tar rŏng lăn, boh nik klei kuôl kă ƀĭng hgŭm kluôm lehanăn đĭ kyar CPTPP mâo Việt Nam ngă Khua kiă kriê thŭn 2026 lehanăn Klei kbĭn trông bi hgŭm bruă duh mkra Asi – Pacifik (APEC) mâo Việt Nam ngă Khua kiă kriê thŭn 2027.

Drông pô bi ala Dhŭng Korea, Khua knŭk kna mñă Knŭk kna Việt Nam srăng mjing klei găl kơ dŭm anôk bruă duh mkra ala tač êngao, hlăm anăn mâo anôk bruă duh mkra Dhŭng Korea hơĭt ai tiê duh bi liê, sui thŭn ti Việt Nam. Ñu mtă kơ dua tĭng mđĭ klei bi hgŭm bruă dhar kreh lehanăn đru kơ Việt Nam mđĭ kyar bruă tuh tia mkra mjing hdră dhar kreh, pŏk mlar hdră mjĕ mjuk mnuih ƀuôn sang hluê bruă tŭ jum mnuih mă bruă Việt Nam nao ngă bruă ti Dhŭng Korea.

Drông pô bi ala Australia, Khua knŭk kna Lê Minh Hưng bi êdah klei mơak hlăk 6 bruă phŭn hlăm Hdră ngă bruă pŏk klei bi mjĕ ƀĭng hgŭm phŭn kluôm dhuôm Việt Nam - Australia wưng thŭn 2024-2027 dưi pŏk ngă djŏ wưng, truh ară anei bi leh 96%. Mñă dua ala čar adôk mâo lu klei găl bi hgŭm, Khua knŭk kna mtă kơ dua tĭng pŏk ngă kjăp dŭm hdră msir phŭn kñăm hluê ngă mta kñăm mnia mblei truh 20 êklai USD lehanăn mđĭ ênoh duh bi liê mơ̆ng dua nah hlăm wưng ti anăp./.