Tlam hruê 29/9, ti Anôk bruă knŭk kna, Anôk kriê dlăng bruă Đảng Knŭk kna lehanăn Anôk kriê dlăng bruă Đảng Anôk bruă kƀĭn ala mkŏ mjing klei bi kƀĭn ksiêm dlăng hdră ngă bruă, bi leh dŭm hdră bhiăn, hdră mtrŭn lehanăn hră mơar mprăp ba mdah hŏng Anôk bruă kƀĭn ala ti Klei bi kƀĭn tal 2, Anôk bruă kƀĭn ala gưl XVI. Khua knŭk kna Lê Minh Hưng lehanăn Khua Anôk bruă kƀĭn ala Trần Thanh Mẫn hrăm mbĭt gĭt gai klei bi kƀĭn.

Ti anôk bi kƀĭn anei, Knŭk kna mĭn tĭng ba mdah kơ Anôk bruă kƀĭn ala 95 hră mơar, hră hưn mdah lehanăn klei hưn, hlăm anăn mâo 44 hdră bhiăn lehanăn hdră mtrŭn, mâo 7 hdră bhiăn mkra mjing mrâo, 36 hdră bhiăn mkra mlih, mbŏ lehanăn 1 hdră mtrŭn. Knŭk kna dôk mjêč mprăp hră mơar hdră êlan duh bi liê kơ dŭm hdră bruă hnơ̆ng ala čar dôk hlăm klei dưi mơ̆ng Bruă kƀĭn ala ksiêm dlăng. Khua knŭk kna Lê Minh Hưng mñă klă, hnơ̆ng bruă jing prŏng, lu hdră bhiăn mâo klei hmăi klă anăp kơ mnuih ƀuôn sang lehanăn anôk bruă duh mkra, msĕ si Hdră bhiăn lăn ala, Hdră bhiăn ngăn prăk Knŭk kna, Hdră bhiăn duh bi liê knŭk kna bi mguôp, Hdră bhiăn hình sự lehanăn Hdră bhiăn hluê ngă hdră bhiăn ƀuah mkra klei soh. Khua knŭk kna mtă kơ dŭm anôk bruă bi hgŭm kjăp, mprăp mơ̆ng hnưm, msir mghaih jih klei dôk gun kpăk, rơ̆ng hnơ̆ng lehanăn hnơ̆ng tŭ jăk hră mơar ba mdah kơ Klei bi kƀĭn tal 2 mơ̆ng Bruă kƀĭn ala.