Khua knŭk kna Lê Minh Hưng nao hlăm klei bi kƀĭn.  Hlue si Khua knŭk kna Lê Minh Hưng, sang dôk brei mưn brei bi mklă jing bruă phŭn, sui, duh kơ lu mnuih ƀuôn sang, boh nik mnuih mă bruă, phung hriăm gưl prŏng, knuă druh, phung mă bruă knŭk kna leh anăn êpul lĭng kahan mâo klei čiăng mưn sang dôk hŏng ênoh djŏ guôp. Khua knŭk kna mtă kơ Hà Nội mđing ngă êlâo, brei ba anăp, mjêč ksiêm dlăng jih jang hdră kčah, keh lăn, keh sang dôk ngăn drăp knŭk kna dôk ba amâo tŭ dưn čiăng mâo hdră msir dăp, mđĭ kyar gru hmô sang brei mưn, hưn hŏng Khua knŭk kna  boh tŭ hlăm mlan 6 thŭn 2026.

Khua knŭk kna lač klă, dŭm klei bhiăn lông ngă mơ̆ng Hà Nội tơdah mâo klei tŭ dưn srăng bi lar kluôm ala. Blŭ hrăm hlăm knăm rŭ mdơ̆ng, Khua Knơ̆ng bruă sang čư̆ êa ƀuôn prŏng Hà Nội Vũ Đại Thắng bi mklă anei jing knhuang ngă klă klơ̆ng kñăm ba mdah Hdră mtrŭn mơ̆ng Phŭn bruă kđi čar kơ klei rŭ mdơ̆ng leh anăn mđĭ kyar ƀuôn prŏng phŭn hlăm ênuk mrâo, Hdră bhiăn ƀuôn prŏng phŭn, hdră čuăl mkă kluôm ƀuôn prŏng phŭn leh anăn dŭm klei bhiăn, hdră êlan mdê hjăn mơ̆ng Gưl dlông nao hlăm boh sĭt; bi êdah klei gĭr mơ̆ng Hà Nội hlăm bruă yua tŭ dưn dŭm klei bhiăn mâo jao leh čiăng mjing boh kdrŭt đĭ kyar mrâo, wăl mđĭ kyar mrâo leh anăn dŭm ênoh yuôm  mrâo kơ mnuih ƀuôn sang ƀuôn prŏng phŭn.