Hruê 27/5, Phŭn bruă mdrao mgŭn bi hgŭm hŏng Knơ̆ng bruă sang čư̆ êa čar Quảng Ninh mkŏ mjing Knăm pŏk ngă Mlan ngă bruă kyua phung hđêh thŭn 2026 hŏng akŏ “Phung hđeh jăk mơak, êđăp ênang, kjăp knhuang hlăm ênuk mrô”.

Blŭ hrăm hlăm knăm pŏk ngă, K’iăng Khua lăn čar Võ Thị Ánh Xuân mñă klă phung hđeh jing êdei anăp kơ ala čar, bi liê kơ phung hđeh jing bi liê kơ klei mđĭ kyar kjăp mơ̆ng ala čar.  Hlăm dŭm thŭn êgao, lu hdră êlan đru kơ phung hđeh dưi pŏk ngă tŭ dưn msĕ si lăm lui, bi hrŏ prăk hriăm hră kơ hđeh gưl tlâo; đru prăk huă yang hruê kơ phung hđeh; mdơ̆ng sang hră knŭk kna rông ba mlir gưl... Mlan ngă bruă kyua phung hđeh thŭn anei srăng pŏk ngă lu bruă ngă klă sĭt hlăm kluôm ala msĕ si mđĭ klei thâo yua mrô leh anăn êđăp ênang hlăm êlan internet kơ phung hđeh; gang mkhư̆ klei mngăt hlăm êa, klei êka, klei ngă jhat kơ phung hđeh; iêô jak klei kriê dlăng phung hđeh.