Klei bi kƀĭn jing hdră bi blŭ hrăm grăp thŭn plah wah bruă sang čư̆ êa leh anăn êpul êya anôk bruă duh mkra kñăm čih yap klei gun kpăk mơ̆ng boh sĭt leh anăn bi leh hdră êlan. Thŭn anei, klei bi kƀĭn ba mơ̆ng boh phŭn  mơ̆ng klei ruh mgaih klei dleh dlan jing hrăm mbĭt mkŏ mjing hdră êlan, păn kjăp dŭm hdră mtrŭn mơ̆ng Phŭn bruă kđi čar kơ klei mđĭ kyar kreh knhâo, kdrăp mrâo, mlih mrâo mbruă, mlih mrô leh anăn mđĭ kyar bruă duh mkra êngao knŭk kna.

Đặng Hồng Anh, Khua Êpul hgŭm phung duh mkra mda asei Việt Nam brei thâo, hŏng 34 klei bi kƀĭn alŭ wăl hŏng klei bi kƀĭn gưl dlông bi blŭ hrăm hŏng Knŭk kna, klei kñăm jing kƀĭn djăp ênŭm klei akâo mơ̆ng nah gŭ čiăng msir mgaih hlue si gưl mâo klei dưi, mjing klei găl hĭn kơ anôk bruă duh mkra mđĭ kyar.

 “Grăp čar snăn hmei  mbĭt hŏng phung thơ̆ng kơ bruă, phung kreh knhâo hŏng čar srăng mblang, kƀĭn čiăng kah mbha klei hâo hưn, mđing hmư̆ klei blŭ mơ̆ng êpul êya duh mkra, mnia blei leh anăn ksiêm dlăng klei akâo mơĭt kơ čar. Bi bruă hlăm klei dưi mơ̆ng Phŭn bruă, dhar bruă gưl dlông leh anăn Knŭk kna snăn hmei srăng ksiêm dlăng ba hlăm klei akâo čiăng đru kơ êpul êya phung duh mkra mđĭ kyar jăk hĭn hlăm wưng mrâo”.

 Hlăm klei bi kƀĭn, phung bi ala kƀĭn bi trông kơ lu bruă dôk kčah hŏng Dak Lak msĕ bi bi leh wăl bi liê čiăng iêô mkrum klei găl hlue ngă hdră čuăl mkă čar, mđĭ kyar anôk bruă gĭt gai hdră ênoh yuôm bruă lŏ hma mơ̆ng tur knơ̆ng ênoh mrô; mđĭ mlih mrô, mlih mrâo mbruă leh anăn mđĭ kyar wăl mphŭn kơ mbruă.

Kdrêč bi blŭ hrăm pŏk  lu mmông čiăng kơ anôk bruă bi trông hŏng Khua gĭt gai čar leh anăn phung thơ̆ng kơ bruă kơ 4 êpul bruă phŭn, mâo mkra mlih hră mơar, ba yua klei găl lăn ala leh anăn prăk brei čan, mlih mrô - mlih mrâo mbruă, hŏng hdră msir mđĭ kyar anôk ba čhĭ leh anăn klei găl mnuih mă bruă hnơ̆ng jăk.

 Hlăm anăn, ba yua keh lăn leh anăn hră mơar bi liê jing boh phŭn mâo lu anôk bruă duh mkra mđing uêñ. Hlue si Nguyễn Huỳnh Vĩnh Huy, Khua Êpul hgŭm duh mkra mda asei čar Dak Lak, leh bi mŭt, alŭ wăl mâo klei găl đĭ kyar prŏng  hĭn ƀiădah anôk bruă duh mkra ăt dleh dlan tơdah dưi yua klei găl kơ lăn ala kyua ka dưi bi leh.

“Dŭm anôk bruă duh mkra ară anei mâo đa đa hdră bruă dôk čiăng kơ anôk ala. Leh bi mŭt dua čar snăn keh lăn adôk lu ƀiădah ară anei ka mâo klei bhiăn djŏ guôp đru kơ anôk bruă duh mkra ba yua čiăng dưi yua lăn mơ̆ng anôk ala anăn. Kyua anăn ăt dôk guôn Knŭk kna, gưl dlông mâo hdră êlan mrâo čiăng đru kơ anôk bruă duh mkra.”

 Dŭm klei  blŭ mguôp mơ̆ng anôk bruă duh mkra mâo khua gĭt gai čar leh anăn phung thơ̆ng kơ bruă bi trông hlăm klei bi kƀĭn mtam. Dŭm boh phŭn êgao klei dưi alŭ wăl mâo Anôk bruă mkŏ mjing ksiêm dlăng akâo kơ dŭm phŭn, dhar bruă Gưl dlông  leh anăn Knŭk kna ksiêm dlăng, msir mgaih.

Hlue si Đỗ Hữu Huy, Khua Knơ̆ng bruă sang čư̆ êa čar Dak Lak, leh bi mŭt, čar dôk tă hdră wăl đĭ kyar mrâp hŏng 3 krĭng đĭ kyar, 3 hdră bruă duh mkra leh anăn 2 wăl boh kdrŭt; gĭr mâo hnơ̆ng đĭ kyar GRDP kah knar wưng 2026-2030 mâo 11% kơ dlông, GRDP kah knar grăp čô mnuih truh thuŭn 2030 mâo êbeh 153 êklăk prăk.

“Hmei čang hmăng dŭm anôk bruă duh mkra, phung mnia blei, boh nik êpul knuă druh mda asei hrăm mbĭt hŏng čar. Dak Lak ară anei amâo djŏ knŏng mâo mnơ̆ng dhơ̆ng lŏ hma jăk, krĭng wăl prŏng, knhuah dhar kreh hjăn, ƀiădah mâo wăl đĭ kyar mrâo, prŏng. Čiăng nao kbưi hĭn, kjăp  hĭn, brei drei mâo thiăm kdrăp mrâo kriê dlăng hnơ̆ng čuăn, phŭn prăk leh anăn klei duh myơr mơ̆ng dŭm anôk bruă duh mkra ba anăp čiăng mjing ai êdah kdlưn đĭ kyar mrâo”.

 Hlăm jar hdră bruă, Knơ̆ng bruă sang čư̆ êa čar Dak Lak leh anăn Êpul hgŭm duh mkra mda asei Việt Nam siñê leh hră bi hdơr kơ klei mđĭ kyar bi liê, đru kơ anôk bruă duh mkra leh anăn mđĭ kyar êpul duh mkra ti alŭ wăl.