Hlăm klei bi kƀĭn, Êpul gơ̆ng bruă ƀuôn sang čar Gia Lai bi mklă leh, hdră mtrŭn mbha prăk bi liê knŭk kna wưng man dưn  2026-2030; mkra mlih hdră kčah bi liê knŭk kna thŭn 2026; hdră êlan mđĭ kyar bruă lŏ hma, krĭng ƀuôn sang, kreh knhâo kdrăp mrâo, sang dôk ala ƀuôn, mđĭ kyar mnuih mă bruă leh anăn klei hdĭp mda ala ƀuôn.

Klei năng mđing, Êpul gơ̆ng bruă ƀuôn sang čar Gia Lai bi mklă hdră mtrŭn mbŏ êbeh 4.700 êklai prăk mơ̆ng prăk hrui wĭt leh anăn prăk knŭk kna kơ thŭn 2026, mđĭ ênoh hdră kčah bi liê knŭk kna thŭn 2026 truh giăm 18.000 êklai prăk. Blŭ hră, mjưh ruê̆ klei bi kƀĭn, Khua Êpul gơ̆ng bruă ƀuôn sang čar Gia Lai  Rah Lan Chung mtă kơ Knơ̆ng bruă sang čư̆ êa čar Gia Lai hŏng dŭm knơ̆ng, dhar bruă, alŭ wăl mjêč pŏk ngă klei tŭ dưn dŭm hdră mtrŭn mrâo bi mklă, hnưm ba yua hdră mtrŭn hlăm klei hdĭp, mjing boh kdrŭt mđĭ kyar pral leh anăn kjăp kơ Gia Lai.